Ақсарай «американиң хитай һәққидики истратегийәлик пилани» ни елан қилди

Мухбиримиз ирадә
2020-05-21
Елхәт
Пикир
Share
Принт

Ақсарай 20-май күни хитайниң иқтисадий сиясити, һәрбий тәрәққияти, хата учур тарқитиш паалийити вә кишилик һоқуқ дәпсәндичилики қатарлиқ мәсилилири тилға елинған бир әтраплиқ доклат елан қилди.

«CNBC» Қанилиниң хәвиригә қариғанда, ақсарайдики исмини ашкарилимиған бир әмәлдарниң ейтишичә, «американиң хитай һәққидики истратегийәлик пилани» дәп аталған бу 20 бәтлик доклат корона вируси юқуминиң зийиниға учрап қаттиқ зиян тартқан америка хәлқиниң хитайға қаттиқ позитсийәдә болуштин ибарәт арзусини әкс әттүридикән.

Бу әмәлдар мундақ дегән: «өткән 20 йилда америка өзиниң базирини хитайға кәң ачти, америка хитайға көп мәбләғ селип, уларни американиң юқири дәриҗилик техникиси билән тәминлиди вә хитай һәрбий офитсер-әскәрлирини тәрбийәләш пурсити билән тәминлиди, америка тәрәп мушундақ қилсақ хитай тәдриҗий һалда демократийәлишиду, дәп ойлиған иди. Буниң әксичә хитай 1989-йили тйәнәнмен мәйданида оқуғучиларниң демократийә тәләп қилған намайишини қанлиқ бастурғандин буян техиму мустәбитләшти, хитай буниң биләнла қалмай өзиниң сиясий идийәсини дуняға йейиш үчүн һәрикәт қилмақта.»

Америка-хитай арисидики мунасивәтләр тез сүрәт билән чекиниватқан бир пәйттә елан қилинған бу истратегийә пилани диққәт қозғиди.

Америка ташқи ишлар министири майк помпейо бу доклат елан қилиништин бир күн аввал, йәни 20-май күни қилған сөзидиму американиң илгири хитайни хата мөлчәрләп қойғанлиқини вә хитайға нурғун ярдәм бәргәнликини билдүргән. Ү сөзидә: «биз бейҗиңниң идийәви вә сиясий җәһәттә әркин дөләтләргә қанчилик дәриҗидә дүшмәнлик қилидиғанлиқини сәл чағлап қаптуқ, пүтүн дуня бу пакитқа әмди диққәт қилип ойғиниватиду,» дегән.

Пикирләр (0)
Share
Толуқ бәт