Төт нәпәр америка пуқраси хитайда пичақланди

Вашингтондин мухбиримиз әзиз тәйярлиди
2024.06.11

Ройтерс агентлиқиниң 11-июндики хәвиридә ейтилишичә, алдинқи күни америка тәвәликидики төт нәпәр оқутқучи хитайниң җилин өлкисидә пичақ һуҗумиға учрап охшимиған дәриҗидә зәхимләнгән.

Хәвәрдин мәлум болушичә, пичақ һуҗуми қилғучи 55 яшлиқ сүй фамилилик хитай болуп, шу күнниң өзидила тутулған. Шу күни җилин шәһиридики бейшән бағчисида сәйлә қиливатқан төт нәпәр чәт әллик туюқсиз башланған пичақ һуҗумида өзини далдиға елип болғучә нәччә йеригә пичақ санҗилған. Кейинчә уларниң америка тәвәликидики оқутқучилар икәнлики, пичақ һуҗумини тосувалмақчи болған йәнә бир хитай саяһәтчиниңму пичақ йегәнлики мәлум болған.

Җилин шәһәрлик сақчи идарисиниң баянатчиси яридарларниң яриси һаятиға хәвп йетидиған дәриҗидә әмәсликини, шуниңдәк пичақ һуҗумиға сәвәб болған амилниң намәлум икәнликини билдүргән. Хитай ташқи ишлар министирлиқиниң баянатчиси лин җйән бу һәқтә тохтилип “бу бир қетимлиқ тасадипий һадисә. Бу һәргизму икки дөләт оттурисидики мәдәнийәт алмаштуруш паалийитини тохтитип қоялмайду” дегән. Америка қошма иштатлири (а қ ш) ниң бейҗиңдики баш әлчиси николас бурнс (Nicholas Burns) бу һәқтә X тә учур йоллап “америка пуқралири дуч кәлгән пичақ һуҗумидин бәкму ғәзәпләндим” дегән.

Хитай һөкүмити йеқиндин буян охшимиған шәкилдә “саяһәтчиликни тәшвиқ қилиш, иҗабий образ турғузуш” паалийитигә күч чиқириватқан болуп, бу қетимқи пичақлиқ һуҗум бу тиришчанлиққа чүшкән бир чоң дағ, дәп қаралмақта. “дөләтлик хәлқ радийоси” (NPR) ниң бу һәқтики хәвиридә ейтилишичә, бир қисим анализчилар йеқиндин буян хитайда әвҗ еливатқан “ғәрбкә қарши хитай милләтчилики” ни буниңдики бир муһим сәвәб болуши мумкин, дәп қаримақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.