Töt neper amérika puqrasi xitayda pichaqlandi

Washin'gtondin muxbirimiz eziz teyyarlidi
2024.06.11

Roytérs agéntliqining 11-iyundiki xewiride éytilishiche, aldinqi küni amérika tewelikidiki töt neper oqutquchi xitayning jilin ölkiside pichaq hujumigha uchrap oxshimighan derijide zeximlen'gen.

Xewerdin melum bolushiche, pichaq hujumi qilghuchi 55 yashliq süy famililik xitay bolup, shu künning özidila tutulghan. Shu küni jilin shehiridiki béyshen baghchisida seyle qiliwatqan töt neper chet ellik tuyuqsiz bashlan'ghan pichaq hujumida özini daldigha élip bolghuche nechche yérige pichaq sanjilghan. Kéyinche ularning amérika tewelikidiki oqutquchilar ikenliki, pichaq hujumini tosuwalmaqchi bolghan yene bir xitay sayahetchiningmu pichaq yégenliki melum bolghan.

Jilin sheherlik saqchi idarisining bayanatchisi yaridarlarning yarisi hayatigha xewp yétidighan derijide emeslikini, shuningdek pichaq hujumigha seweb bolghan amilning namelum ikenlikini bildürgen. Xitay tashqi ishlar ministirliqining bayanatchisi lin jyen bu heqte toxtilip “Bu bir qétimliq tasadipiy hadise. Bu hergizmu ikki dölet otturisidiki medeniyet almashturush pa'aliyitini toxtitip qoyalmaydu” dégen. Amérika qoshma ishtatliri (a q sh) ning béyjingdiki bash elchisi nikolas burns (Nicholas Burns) bu heqte X te uchur yollap “Amérika puqraliri duch kelgen pichaq hujumidin bekmu ghezeplendim” dégen.

Xitay hökümiti yéqindin buyan oxshimighan shekilde “Sayahetchilikni teshwiq qilish, ijabiy obraz turghuzush” pa'aliyitige küch chiqiriwatqan bolup, bu qétimqi pichaqliq hujum bu tirishchanliqqa chüshken bir chong dagh, dep qaralmaqta. “Döletlik xelq radiyosi” (NPR) ning bu heqtiki xewiride éytilishiche, bir qisim analizchilar yéqindin buyan xitayda ewj éliwatqan “Gherbke qarshi xitay milletchiliki” ni buningdiki bir muhim seweb bolushi mumkin, dep qarimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.