Mayk pompéyo xitayni Uyghurlarni keng kölemlik qamashtek "Tragédiyelik" we "Yirginchlik" qilmishqa xatime bérishke chaqirdi

Muxbirimiz ümidwar
2019-03-27
Élxet
Pikir
Share
Print

Amérika tashqi ishlar ministiri mayk pompéyo xitay hökümitini Uyghurlarni keng kölemlik tutup qilip yighiwélish lagérlirigha qamashtek "Tragédiyelik" we "Yirginchlik" qilmishqa xatime bérishke chaqirghan. Pompéyo bu sözlerni 26‏-mart küni amérika tashqi ishlar ministirliqining axbarat yighinida bir muxbirning Uyghurlar heqqidiki so'aligha jawab bergende tekitligen. U: "Bizning bu mesilidiki sözimiz nahayiti ochuq. Shuningdek biz bu toghrisida uzundin béri ular bilen xupiyane sözliship kéliwatimiz. Elwette, bu orunlarda yüz minglarche kishi tutup turulmaqta. Biz buni tarixi xaraktérlik kishilik hoquqni xorlash, dep körsitiwatimiz. Biz xitayni uning bu qilmishining tragédiyelik we yirginchlik ikenliki we buni toxtitishi kéreklikige qayil qilishqa tirishiwatimiz" dégen.

Amérika hökümitining ilgiri sürüshiche, nöwette 800 mingdin 2 milyon'ghiche Uyghur, qazaq we bashqa musulman az sanliq milletler bu lagérlarda tutup turulmaqtiken. Lékin xitay hökümiti bu lagérlarning radikalliqqa qarshi "Kespiy maharet merkezliri" ikenliki, uning oqughuchilarni bikarliq tamaq we turalghu bilen teminleydighan "Yataqliq mektepler" ge oxshaydighanliqini ilgiri sürüp keldi. Lékin kishilik hoquq teshkilatlirining ilgiri sürüshiche, tutqunlar bu lagérlarda tili medeniyiti, diniy étiqadini ret qilishqa mejburlinip, jismaniy we rohiy jazalargha uchrimaqta iken. Amérika tashqi ishlar ministirliqi yéqinda élan qilghan yilliq kishilik hoquq doklatida, xitayning lagér qurup, Uyghurlarni qamashtiki meqsitining Uyghur kimlikini yoqitish ikenlikini ilgiri sürgen. Amérika tashqi ishlar ministirliqining bir bayanatchisi ötken hepte Uyghurlarni xorlawatqan bezi xitay emeldarlirigha "Tedbir qollinish" ni oylishiwatqanliqini bildürgen idi.

Toluq bet