Америка кеңәш палатаси һәрбий ишлар комитетиниң рәиси чен чүәнгони җавабкарлиққа тартишни тәләп қилди

Мухбиримиз әркин
2019-09-27
Елхәт
Пикир
Share
Принт

Америка кеңәш палатаси һәрбий ишлар комитетиниң җумһурийәтчи рәиси җим инхоф билән демократик һәйәт әзаси җәк ред ташқи ишлар министири майк помпейоға мәктуп йезип, чен чүәнгони өз ичигә алған хитай әмәлдарлирини җавабкарлиққа тартишни тәләп қилған.

Бу америка дөләт мәҗлиси һәрбий ишлар комитети мәсуллириниң тунҗи қетим уйғур мәсилиси һәққидә трамп һөкүмитигә мәктуп йезишидур. Мәктупта хитай һөкүмитиниң диний әркинликни дәпсәндә қилиши чоңқур әндишә қозғаватқанлиқи тәкитлинип, «биз бейҗиңниң изчил күчийип меңиватқан диний аз санлиқларни бастурушиға қарита давамлиқ тәдбирләрни тепип чиқишиңизни, шундақла хитай һөкүмитиниң қилмишини җавабкарлиққа тартишиңизни, шинҗаң уйғур аптоном районлуқ парткомниң секретари чен чүәнгони өз ичигә алған хитай компартийәси мәркизи комитетиниң шинҗаң ишлириға мәсул башқа юқири дәриҗилик әзалириға ‹йәр шари магнетиский кишилик һоқуқ қануни' ни ишқа селишиңизни тәләп қилимиз» дейилгән. 

Мәктупта йәнә әң қорқунчлуқи һөкүмәтниң уйғур аптоном районида кишиләрни кәң көләмлик тутқун қилип, йиғивелиш лагерлириға қамиғанлиқи икәнликини, хәвәрләрдә уйғурларни асас қилған аз дегәндә бир милйон кишиниң бу лагерларға қамилип, меңә ююшқа вә контроллуққа учраватқанлиқи тәкитлиниватқанлиқини билдүргән. 

Мәктупта йәнә ташқи ишлар министирлиқиниң 2018‏-йиллиқ диний әркинлик доклати нәқил кәлтүрүлүп, «бу лагерларда өлүм-йитим йүз бериватқанлиқи вә кишиләрниң ғайиб болуватқанлиқиға даир хәвәрләр кәлмәктә. Һөкүмәт бу кишиләрни етник вә диний кимликигә қарап тутқун қилмақта. Тутқунларниң җинсий хорлашни өз ичигә алған һәр хил шәкилдики тән җазаси яки шәпқәтсиз, ғәйрий инсаний вә кәмситиш характерлик муамилиләргә учраватқанлиқи илгири сүрүлмәктә» дейилгән. 

Лекин бу америка дөләт мәҗлиси әзалириниң «магнетиский қануни» ни ишқа селиш һәққидә трамп һөкүмитигә язған тунҗи мәктуби әмәс. Көзәткүчиләрниң илгири сүрүшичә, нөвәттә америка һөкүмити техиму кәң җамаәт пикри топлап, хитайға хәлқара бесимни күчәйтиш йолини таллимақта икән.

Пикирләр (0)
Share
Толуқ бәт