Хитай депломатларға америкадики бәлгилик органлар билән учришишитин аввал мәлумат бериш чәклимиси қоюлған

Мухбиримиз ирадә
2019-10-17
Елхәт
Пикир
Share
Принт

«Ню-йорк вақти гезити» ниң хәвиридә ейтилишичә, америка ташқий ишлар минситирлиқи америкада турушлуқ хитай депломатлириға қарита йеңи түзүм чиқарған. Йеңи түзүм бойичә, америкада турушлуқ хитай депломатлири америкадики һәрқандақ йәрлик органлар, дөләт органлири хадимлири вә шундақла маарип вә тәтқиқат органлири билән көрүшүштин аввал америка ташқий ишлар министирлиқиға мәлум қилиши керәккән.

Америка ташқий ишлар министирлиқидики мәсул хадимниң таратқуларға билдүрүшичә, юқириқи бу түзүм хитай һөкүмитиниң хитайда турушлуқ америка депломатлириға қойған бәлгилимисигә қайтурулған инкас болуп, америкалиқ депломатларму хитайда һәрқандақ бир органни зиярәт қилиш яки башқа өлкиләргә хизмәт мунасивити билән саяһәт қилиштин бурун бейҗиң даирилиридин рухсәт сорайдикән. 

Бирақ 16-өктәбир күни хитайниң америкада турушлуқ әлчиханиси мәзкур қарарға етираз билдүргән. Улар «америка ташқий ишлар минстирлиқи хитай депломатларға қойған бу чәклимә виянна келишимигә хилап. Хитайда америка әлчиханиси вә консулханилириға бундақ чәклимә йоқ,» дегән. 

Юқириқи бу қарар икки дөләт мунасивәтлиридики йириклишишниң йәнә бир ипадиси, дәп қаралмақта. Хитайниң америкада түрлүк усуллар арқилиқ йүргүзүватқан җасуслуқ һәрикәтлири америкада йеқиндин буян зор ғулғула қилиниватқан бир мәсилигә айланған. 

«Ню-йорк вақти гезити» ниң ейтишичә, америка федиратсийә тәкшүүш идариси америкадики һәрқайси унверсититларниң пән-тәтқиқат мәркәзлирини бу һәқтә алаһидә агаһландуруп, уларни хитайдики дөләткә мунасивәтлик пән-тәтқиқат органлири вә шеркәтлиридин кәлгән зиярәтчиләрни тәкшүрүшни вә һәмкарлиқини көздин кәчүрүшни тәләп қилған. 

Америка ташқий ишлар министирлиқи хитай депломатлириға қоюлған юқириқи чәклимә бойичә һәр һәптә аз дегәндә 50 әтрапида уқтуруш тапшуруп елишни мөлчәрлимәктикән.

Пикирләр (0)
Share
Толуқ бәт