Xitay déplomatlargha amérikadiki belgilik organlar bilen uchrishishitin awwal melumat bérish cheklimisi qoyulghan

Muxbirimiz irade
2019-10-17
Élxet
Pikir
Share
Print

"Nyu-york waqti géziti" ning xewiride éytilishiche, amérika tashqiy ishlar minsitirliqi amérikada turushluq xitay déplomatlirigha qarita yéngi tüzüm chiqarghan. Yéngi tüzüm boyiche, amérikada turushluq xitay déplomatliri amérikadiki herqandaq yerlik organlar, dölet organliri xadimliri we shundaqla ma'arip we tetqiqat organliri bilen körüshüshtin awwal amérika tashqiy ishlar ministirliqigha melum qilishi kérekken.

Amérika tashqiy ishlar ministirliqidiki mes'ul xadimning taratqulargha bildürüshiche, yuqiriqi bu tüzüm xitay hökümitining xitayda turushluq amérika déplomatlirigha qoyghan belgilimisige qayturulghan inkas bolup, amérikaliq déplomatlarmu xitayda herqandaq bir organni ziyaret qilish yaki bashqa ölkilerge xizmet munasiwiti bilen sayahet qilishtin burun béyjing da'iriliridin ruxset soraydiken. 

Biraq 16-öktebir küni xitayning amérikada turushluq elchixanisi mezkur qarargha étiraz bildürgen. Ular "Amérika tashqiy ishlar minstirliqi xitay déplomatlargha qoyghan bu cheklime wiyanna kélishimige xilap. Xitayda amérika elchixanisi we konsulxanilirigha bundaq cheklime yoq," dégen. 

Yuqiriqi bu qarar ikki dölet munasiwetliridiki yiriklishishning yene bir ipadisi, dep qaralmaqta. Xitayning amérikada türlük usullar arqiliq yürgüzüwatqan jasusluq heriketliri amérikada yéqindin buyan zor ghulghula qiliniwatqan bir mesilige aylan'ghan. 

"Nyu-york waqti géziti" ning éytishiche, amérika fédiratsiye tekshüüsh idarisi amérikadiki herqaysi unwérsititlarning pen-tetqiqat merkezlirini bu heqte alahide agahlandurup, ularni xitaydiki döletke munasiwetlik pen-tetqiqat organliri we shérketliridin kelgen ziyaretchilerni tekshürüshni we hemkarliqini közdin kechürüshni telep qilghan. 

Amérika tashqiy ishlar ministirliqi xitay déplomatlirigha qoyulghan yuqiriqi cheklime boyiche her hepte az dégende 50 etrapida uqturush tapshurup élishni mölcherlimektiken.

Toluq bet