Awam palata re'isi nensi pelusi amérika döletlik tilawet nashtiliqida lagérlardiki Uyghur tutqunlirigha du'a qildi

Muxbirimiz erkin
2020-02-06
Élxet
Pikir
Share
Print

Amérika awam palatasining bashliqi nensi pelusi 6‏-féwral küni washin'gtonda ötküzülgen bir diniy yighilishta xitay yighiwélish lagérliridiki 3 milyondek Uyghur, qazaq we bashqa musulman tutqunlirigha du'a qilghan.

U bu du'a-tilekni yilda bir qétim ötküzülidighan amérika döletlik tilawet nashtiliqida qilghan. U döletlik tilawet nashtiliqida prézidént donald trampning arqisidin sehnige chiqip du'a qilghanda tengrining lagéridiki tutqunlargha ésenlik bérishini tiligen.

Amérika döletlik tilawet nashtiliqi amérika prézidénti, mu'awin prézidénti, awam palata re'isini öz ichige alghan amérikaning her qaysi sahelerdiki erbablar, siyasiyonlar, diniy zatlar, pa'aliyetchiler bir yerge jem bolup, tengrige özining tilek-isteklirini yetküzidighan bir diniy yighilishtur. Mezkur pa'aliyet 1953‏-yili sabiq amérika prézidénti déwayt ayzénxowérning teshebbusi bilen bashlan'ghan. Shuningdin béri bu pa'aliyet her yili bir qétim mushu mezgilde ötküzülüp kelmekte.

Nensi pelusi du'asida mundaq dégen: "Ah tengrim, sen bizning bügünki etigenlik bu nashtida bu yerge jem bolup, diniy étiqadi seweblik jazalan'ghan mezlumlargha, iz-déreksiz ghayib bolghan we öltürülgen milyonlighan kishilerge du'a qilishimizgha imkan bergining üchün rehmet éytimiz. Biz penchen lamagha we özining diniy étiqadigha egiship, xitayda türmilerge tashlan'ghan hem ghayib bolghan barliq tibet buddistlirigha du'a qilimiz... Xitayda öyliridin heydilip, lagérlargha qamalghan bir milyondin üch milyon'ghiche bolghan Uyghurlargha du'a qilimiz. Shundaqla biz se'udi erebistanliq ra'if bedawigha, özining pikirini erkin ipadilep, türmilerge qamalghan yazghuchi hem erkin diniy mutepekkurlargha du'a qilimiz." 

Nensi pelusi bu sözlerni xitayda "Wuxen wirusi" keng tarqilip, uning yuqumi Uyghur aptonom rayonigha yétip barghan shundaqla uning lagérlargha tarqilip kétish éhtimalliqi chet'el tébbiy mutexessisliride endishe qozghap, dunya sehiye teshkilatining lagérlarda tekshürüsh élip bérishini telep qiliwatqan mezgilde qildi.

Mezkur murasimgha Uyghur pa'aliyetchilerdin "Uyghur herikiti" teshkilatining re'isi roshen abbas, xitay türmisidiki Uyghur ziyaliysi ilham toxtining qizi jewher ilham qatarliqlar alahide teklip qilin'ghan we murasimda "Uyghur herikiti" teshkilatining nami atap ötülgen.

Toluq bet