Washin'gtonda “Amérika-sherqiy jenubiy asiya elliri ittipaqi merkizi” qurulidiken

Washin'gtondin muxbirimiz irade teyyarlidi
2023.09.08

Amérika paytexti washin'gtonda “Amérika-sherqiy jenubiy asiya elliri ittipaqi merkizi” qurulidiken.

Amérika tashqi ishlar ministirliqining bu heqte tarqatqan bayanatidin qarighanda, mezkur qarar hindonéziyening paytexti jakartada ötküzülgen “Amérika-sherqiy jenubiy asiya elliri ittipaqi bashliqlar yighini” da, amérikaning mu'awin pirézidénti kamala xarris (Kamala Harris) teripidin élan qilin'ghan.

Bu merkezni amérika hökümiti arizona shitatliq uniwérsitét (ASU) bilen hemkarlashqan asasta quridiken. Bu merkez amérika bilen sherqiy jenubiy asiya elliri ittipaqi-asé'an (ASEAN) ning munasiwitini téximu tüzümleshtürüsh, chongqurlashturush we shuning bilen bir waqitta amérikaning sherqiy jenubiy asiya döletliri bilen bolghan iqtisadiy we medeniyet alaqisini qollashta rol oynaydiken.

Amérika tashqi ishlar ministirliqining bu heqtiki bayanatida mundaq déyilgen:

“1977-Yili diyalog hemkarliqimiz qurulghandin buyan, amérika sherqiy jenubiy asiya elliri ittipaqi bilen siyasiy, xewpsizlik, iqtisad we ijtima'iy-medeniyet saheliride keng hemkarliq ornatti. Bu merkezning pa'aliyetliri amérika bilen sherqiy jenubiy asiya elliri ittipaqining ochuq-ashkara, bir gewdileshken, güllen'gen, we bixeter rayon berpa qilishtiki ortaq tirishchanliqini qollashni meqset qilidu.”

Bu heqtiki xewerlerdin melum bolushiche, washin'gtonda “Amérika-sherqiy jenubiy asiya elliri ittipaqi merkizi” qurush pilanini, amérika baydén hökümitining xitayning hindi-tinch okyandiki kéngeymichilik herikitige taqabil turush tirishchanliqining bir qismi, déyishke bolidiken.

Xitayning hindi-tinch okyan rayonidiki herbiy mewjutluqini zoraytishi, teywen'ge tehdit sélishi we amérika bilen bolghan munasiwetlirining yiriklishishi netijiside, amérika hökümiti hindi-tinch okyan rayonidiki döletler bilen bolghan her türlük hemkarliqini kücheytishke alahide ehmiyet bérishke bashlighan idi. Baydén hökümiti “Amérika-sherqiy jenubiy asiya elliri ittipaqi bashliqlar yighini” ning 2022-yilliq yighinida, öz ara munasiwitini “Köp tereplimilik istratégiyelik hemkarliq” (Comprehensive Strategic Partnership) derijisige kötürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.