Amérika déngiz armiye mektipi oqughuchilirigha Uyghurlar heqqide chüshenche bérildi

Muxbirimiz eziz
2017-04-14
Élxet
Pikir
Share
Print

13-Aprél küni amérika qoshma shtatliri (a q sh) déngiz armiye ofitsérliri mektipide yene bir nöwetlik "Foréstal léksiyesi" ötküzüldi. Léksiyede ofitsérliq boyiche terbiyiliniwatqan töt mingdin köp oqughuchi, herqaysi tarmaq mekteplerdin kelgen wekiller we sirtlardin kelgen bir qisim méhmanlar général jon allénning léksiyesini anglidi.

Jon allén amérika déngiz armiyisi quruqluqta jeng qilghuchi qisimlirining générali, shundaqla shimaliy atlantik ehdi teshkilati (sh a e t, yeni nato) xelq'ara tinchliq qoshuni we amérika armiyesining afghanistanda turushluq qisimlirida herbiy qomandanliq wezipisini ötigen.

Hazir a q sh "Bixeterlik we istratégiye komitéti" ning re'isi bolup ishlewatqan général allén bu qétim asasliq qilip "Hazirqi dunya weziyitide muqimsizliq peyda qiliwatqan amillar" dégen témida léksiye bergen bolup, buningda "Töt qoshulghan bir" sheklidiki dunya méxanizmining mewjutluqini tekitligen.

Uning pikriche bu méxanizmdiki töt asasliq amil rusiye, xitay, iran we shimaliy koréye bolup, hazir mewjut boluwatqan jihad esebiylikini beshinchi amil süpitide buninggha qoshushqa bolidiken. Mana mushu besh amil nöwette dunyada muqimsizliq we parakendichilik peyda qiliwatqan asasliq menbeler iken.

Général allén sözide bu ehwallargha misal teriqiside rusiyening qirimni özige qoshuwélishi, xitay herbiy qisimlirining Uyghurlarni basturuwatqanliqi qatarliqlarni tilgha élip "Mana mushular hazirqi dunyada muqimsizliq peyda qiliwatqan amillardur" dep körsetken.

Melum bolushiche "Foréstal léksiyesi" a q sh déngiz armiye ofitsérliri mektipide 1970-yilidin buyan ötküzülüp kéliwatqan bolup, buningda mezkur mektep oqughuchilirini amérika we dunyaning siyasiy, iqtisad we medeniyet saheliride körülüwatqan yéngi yüzlinishtin xewerdar qilish meqset qilinidiken.

Amérikining sabiq dölet ishlar ministiri hénriy kisin'gir, amérika döletlik zeytun top komandisining bash meshqawuli dik wérmél qatarliqlar ilgiri mushu pa'aliyette léksiye bergen iken.

Toluq bet