Америка сиясийонлири уйғурларға четишлиқ баянат елан қилди

Мухбиримиз әзиз
2022-01-06
Share

Америка кеңәш палатасиниң җумһурийәтчиләр партийәсидин болған әзаси рик скот әпәнди 5-январ күни баянат елан қилип хәлқара олимпик комитетиниң “уйғур мәҗбурий әмгикини аяғлаштуруш иттипақи” ниң вәкиллири билән көрүшүшни рәт қилғанлиқини кәскин әйиблиди.

Палата әзаси рик скотниң тор бетидә елан қилинған бу һәқтики баянатта көрситилишичә, муһаҗирәттики уйғур тәшкилатлири вә башқа пуқравий җәмийәтләрниң һәмкарлиқида вуҗудқа кәлгән “уйғур мәҗбурий әмгикини аяғлаштуруш иттипақи” бирнәччә айдин буян уйғур дияридики қирғинчилиқ вә мәҗбурий әмгәк мәсилисини муһим тема қилған һалда хәлқара олимпик комитетидин бу һәқтә сөһбәт өткүзүшни, шундақла уларниң бу мәсилидә хитай һөкүмитигә бесим қилишини тәләп қилған. Әмма хәлқара олимпик комитети бу тәләпни рәт қилған.

Америка ташқи ишлар министирлиқиниң сабиқ хизмәтчиси беннет фремән мәзкур иттипаққа вакалитән бу қетимқи сөһбәт тәлипини хәлқара олимпик комитетиға йоллиған болуп, бу һәқтә әһвал тонуштуруп “хәлқара олимпик комитети уйғур мәҗбурий әмгикигә четишлиқ мәһсулатларни олимпик мусабиқиси тәвәликидин сиқип чиқиришни халимиди” дегән.

Бу һәқтики әһвал “нйо-йорк вақти” гезитидә тәпсилий хәвәр сүпитидә елан қилинғандин кейин кеңәш палата әзаси рик скот әпәнди мәзкур баянатни елан қилған. У баянатта ениқ қилип: “хитай компартийәси қирғинчилиқни давам қилмақта. Уйғурларни давамлиқ һалда җаза лагерлириға қамап уларни мәҗбурий әмгәккә салмақта. Мушундақ әһвалда хәлқара олимпик комитетиниң мусабиқә кийимлириниң мәҗбурий әмгәккә бағлинишлиқ яки әмәслики һәққидики соалға җаваб бәрмигәнлики уларниң 100 пирсәнт һалда ши җинпиңниң қирғинчилиқиға шерик болуватқанлиқини көрситиду. Биз орнимиздин дәст турушимиз һәмдә баш секретар ши җинпиңни қиливатқан қирғинчилиқи үчүн җазаға тартишимиз лазим” дегән.

Худди шу күнниң өзидә өзидә демократлар партийәсидин болған кеңәш палата әзаси, америка дөләт мәҗлиси қармиқидики хитай ишлири иҗраийә комитетиниң рәиси җеф меркелий америка електр маторлуқ аптомобил саһәсидики байрақдар ширкәт болған Tesla ширкитиниң үрүмчидә көргәзмә зали ачқанлиқини кәскин әйиблиди. 5-январ күни “яху иқтисад көзники” ниң бу һәқтики зияритини қобул қилғанда җеф меркелий әпәнди бу һәқтә тохтилип “Tesla ширкитиниң бу қилмииши маһийәттә хитай һөкүмитиниң уйғурлар вә башқа мусулманларға йүргүзүватқан бастурушлирини йошуруш ролини ойнайду. Бир америка ширкитиниң қирғинчилиқ вә мәҗбурий әмгәк давам қиливатқан бир районда өз содисини башлиши учиға чиққан әхлақсизлиқ” дегән. Шундақла америка президенти җов байден “уйғур мәҗбурий әмгикини чәкләш қануни” ға имза қойғанниң әтиси Tesla ширкитиниң бу көргәзмә залини ечишиниң өзи елан маскниң “бу ишлар үчүн бизниң пәрвайимиз пәләк” дегәнликигә баравәр икәнликини алаһидә тәкитләйду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт