Amérika siyasiyonliri Uyghurlargha chétishliq bayanat élan qildi

Muxbirimiz eziz
2022-01-06
Share

Amérika kéngesh palatasining jumhuriyetchiler partiyesidin bolghan ezasi rik skot ependi 5-yanwar küni bayanat élan qilip xelq'ara olimpik komitétining “Uyghur mejburiy emgikini ayaghlashturush ittipaqi” ning wekilliri bilen körüshüshni ret qilghanliqini keskin eyiblidi.

Palata ezasi rik skotning tor bétide élan qilin'ghan bu heqtiki bayanatta körsitilishiche, muhajirettiki Uyghur teshkilatliri we bashqa puqrawiy jem'iyetlerning hemkarliqida wujudqa kelgen “Uyghur mejburiy emgikini ayaghlashturush ittipaqi” birnechche aydin buyan Uyghur diyaridiki qirghinchiliq we mejburiy emgek mesilisini muhim téma qilghan halda xelq'ara olimpik komitétidin bu heqte söhbet ötküzüshni, shundaqla ularning bu mesilide xitay hökümitige bésim qilishini telep qilghan. Emma xelq'ara olimpik komitéti bu telepni ret qilghan.

Amérika tashqi ishlar ministirliqining sabiq xizmetchisi bénnét frémen mezkur ittipaqqa wakaliten bu qétimqi söhbet telipini xelq'ara olimpik komitétigha yollighan bolup, bu heqte ehwal tonushturup “Xelq'ara olimpik komitéti Uyghur mejburiy emgikige chétishliq mehsulatlarni olimpik musabiqisi tewelikidin siqip chiqirishni xalimidi” dégen.

Bu heqtiki ehwal “Nyo-york waqti” gézitide tepsiliy xewer süpitide élan qilin'ghandin kéyin kéngesh palata ezasi rik skot ependi mezkur bayanatni élan qilghan. U bayanatta éniq qilip: “Xitay kompartiyesi qirghinchiliqni dawam qilmaqta. Uyghurlarni dawamliq halda jaza lagérlirigha qamap ularni mejburiy emgekke salmaqta. Mushundaq ehwalda xelq'ara olimpik komitétining musabiqe kiyimlirining mejburiy emgekke baghlinishliq yaki emesliki heqqidiki so'algha jawab bermigenliki ularning 100 pirsent halda shi jinpingning qirghinchiliqigha shérik boluwatqanliqini körsitidu. Biz ornimizdin dest turushimiz hemde bash sékrétar shi jinpingni qiliwatqan qirghinchiliqi üchün jazagha tartishimiz lazim” dégen.

Xuddi shu künning özide özide démokratlar partiyesidin bolghan kéngesh palata ezasi, amérika dölet mejlisi qarmiqidiki xitay ishliri ijra'iye komitétining re'isi jéf mérkéliy amérika éléktr matorluq aptomobil sahesidiki bayraqdar shirket bolghan Tesla shirkitining ürümchide körgezme zali achqanliqini keskin eyiblidi. 5-Yanwar küni “Yaxu iqtisad közniki” ning bu heqtiki ziyaritini qobul qilghanda jéf mérkéliy ependi bu heqte toxtilip “Tesla Shirkitining bu qilmi'ishi mahiyette xitay hökümitining Uyghurlar we bashqa musulmanlargha yürgüzüwatqan basturushlirini yoshurush rolini oynaydu. Bir amérika shirkitining qirghinchiliq we mejburiy emgek dawam qiliwatqan bir rayonda öz sodisini bashlishi uchigha chiqqan exlaqsizliq” dégen. Shundaqla amérika prézidénti jow baydén “Uyghur mejburiy emgikini cheklesh qanuni” gha imza qoyghanning etisi Tesla shirkitining bu körgezme zalini échishining özi élan maskning “Bu ishlar üchün bizning perwayimiz pelek” dégenlikige barawer ikenlikini alahide tekitleydu.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet