Америка ташқи ишлар министирлиқи: «биз хитай һөкүмитини шинҗаңдики өз пуқралирини вәһимигә селиштәк рәһимсиз сияситигә хатимә беришкә чақиримиз»

Мухбиримиз әркин
2020-01-17
Елхәт
Пикир
Share
Принт

Америка ташқи ишлар министирлиқи 16‏-январ күни радийомизда язма баянат елан қилип, хитайниң уйғур районидики лагер тутқунлирини қоюп бериши, униң өз пуқралириға вәһимигә селиштәк рәһимсиз сияситигә хатимә беришини тәләп қилди. Америка ташқи ишлар министирлиқиниң баянати 15‏-январ күни америка-хитай 1‏-басқучлуқ сода келишими ақ сарайда имзалинип арқидинла елан қилинди.

Мәзкур баянат радийомизниң америка ташқи ишлар министирлиқиға йоллиған америка-хитай сода келишими америка һөкүмитиниң уйғур мәсилисигә болған әндишилиригә қандақ тәсир көрситиду? дөләт мәҗлисиниң уйғур кишилик һоқуқ қанун лайиһәсини авазға қоюшини кечиктүрүши яки тохтитип турушини тәләп қиламду? дегәндәк соаллириға җавабән елан қилинди. Америка-хитай 1‏-басқучлуқ сода келишиминиң «уйғур кишилик һоқуқ қанун лайиһәси» америка кеңәш палатасида тезрақ авазға қоюлуп, президентниң мақуллишиға сунулуши тәләп қилиниватқан мәзгилдә имзалиниши муһаҗирәттики уйғурларда бәзи әндишиләрни қозғиған. Бу әндишиләр қанун лайиһәсиниң йетәрлик авазға еришәлмәслики, вақитниң созулуп кетиши яки қанун лайиһәсиниң мәзмуниға өзгәртиш киргүзүлүп, униңдики бәзи күчлүк маддиларниң аҗизлишип кетиши қатарлиқ җәһәтләрдә ипадиләнгәниди. 

Лекин, америка ташқи ишлар министирлиқи баянатида: «биз узундин бери шуни ениқ ипадиләп кәлдуқ, америка дунядики кишилик һоқуққа хилаплиқ қилғучилар вә уни хорлиғучиларни җавабкарлиққа тартишни қоллап кәлди. Биз бейҗиңниң халиғанчә тутқун қилинған барлиқ тутқунларни дәрһал қоюп беришкә, шундақла шинҗаңдики икки йилдин артуқ вақиттин бери давамлишиватқан өз пуқралирини вәһимигә селиштәк рәһимсиз сиясәткә хатимә беришкә чақиримиз» дәйилгән. Баянатта тәкитлинишичә, «хитай һөкүмитиниң өз қанунлириға әмәл қилипла қалмай, өзиниң хәлқара мәсулйити вә кишилик һоқуқ, түп әркинликкә алақидар мәсилиләрдә үстигә алған мәҗбурийитини ада қилиши шәрт» икән.

Пикирләр (0)
Share
Толуқ бәт