Amérika tashqi ishlar ministirliqi: "Biz xitay hökümitini shinjangdiki öz puqralirini wehimige sélishtek rehimsiz siyasitige xatime bérishke chaqirimiz"

Muxbirimiz erkin
2020-01-17
Élxet
Pikir
Share
Print

Amérika tashqi ishlar ministirliqi 16‏-yanwar küni radiyomizda yazma bayanat élan qilip, xitayning Uyghur rayonidiki lagér tutqunlirini qoyup bérishi, uning öz puqralirigha wehimige sélishtek rehimsiz siyasitige xatime bérishini telep qildi. Amérika tashqi ishlar ministirliqining bayanati 15‏-yanwar küni amérika-xitay 1‏-basquchluq soda kélishimi aq sarayda imzalinip arqidinla élan qilindi.

Mezkur bayanat radiyomizning amérika tashqi ishlar ministirliqigha yollighan amérika-xitay soda kélishimi amérika hökümitining Uyghur mesilisige bolghan endishilirige qandaq tesir körsitidu? dölet mejlisining Uyghur kishilik hoquq qanun layihesini awazgha qoyushini kéchiktürüshi yaki toxtitip turushini telep qilamdu? dégendek so'allirigha jawaben élan qilindi. Amérika-xitay 1‏-basquchluq soda kélishimining "Uyghur kishilik hoquq qanun layihesi" amérika kéngesh palatasida tézraq awazgha qoyulup, prézidéntning maqullishigha sunulushi telep qiliniwatqan mezgilde imzalinishi muhajirettiki Uyghurlarda bezi endishilerni qozghighan. Bu endishiler qanun layihesining yéterlik awazgha érishelmesliki, waqitning sozulup kétishi yaki qanun layihesining mezmunigha özgertish kirgüzülüp, uningdiki bezi küchlük maddilarning ajizliship kétishi qatarliq jehetlerde ipadilen'genidi. 

Lékin, amérika tashqi ishlar ministirliqi bayanatida: "Biz uzundin béri shuni éniq ipadilep kelduq, amérika dunyadiki kishilik hoquqqa xilapliq qilghuchilar we uni xorlighuchilarni jawabkarliqqa tartishni qollap keldi. Biz béyjingning xalighanche tutqun qilin'ghan barliq tutqunlarni derhal qoyup bérishke, shundaqla shinjangdiki ikki yildin artuq waqittin béri dawamlishiwatqan öz puqralirini wehimige sélishtek rehimsiz siyasetke xatime bérishke chaqirimiz" deyilgen. Bayanatta tekitlinishiche, "Xitay hökümitining öz qanunlirigha emel qilipla qalmay, özining xelq'ara mes'ulyiti we kishilik hoquq, tüp erkinlikke alaqidar mesililerde üstige alghan mejburiyitini ada qilishi shert" iken.

Toluq bet