Америка авам палата әзаси җим банкс калифорнийә аммивий пенсийә фондиниң уйғурларни бастурушқа четишлиқ хитай ширкәтлиригә мәбләғ салғанлиқини тәнқид қилди

Мухбиримиз әркин
2020-02-14
Елхәт
Пикир
Share
Принт

Америка авам палата әзаси җим банкс калифорнийә валийси гавин нюзсамға мәктуп йезип, калифорнийә аммивий пенсийә фондиниң уйғурларни бастурушқа четишлиқ хитай технологийә ширкәтлиригә мәбләғ салғанлиқини тәнқидлигән.

Җим банкс мәктбида пенсийә фондиниң мәбләғ ишлири директори мең йүбен вә униң хитай билән болған алақисидин әндишә қиливатқанлиқини илгири сүргән. Ройтерс агентлиқиниң билдүрүшичә, калифорнийә һөкүмәт хадимлириниң пенсийә системиси америкадики әң чоң аммивий пенсийә фонди болуп, униң 400 милярд доллар мәблиғи бар икән. Хитайда туғулуп америка пуқралиқиға өткән мең йүбен икки қетм бу вәзипигә қоюлған. 1‏-Қетим 2008‏-йили, 2‏-қетим 2019‏-йили 1‏-айда мәзкүр фондниң мәсуллиқиға тәйинләнгән. 

Җим банксниң фокус телевизийә қанилиниң зияритини қобул қилғанда билдүрүшичә, мең йүбен мәзкур пенсийә фондиниң 3 милярд 100 милйон доллар мәблиғини 172 охшимиған хитай ширкитигә салған. Җим банкс калифорнийә валийси гавен нюзсамға язған мәктубида бу хитай ширкәтләрниң бәзилирини америка һөкүмитиниң «қара тизимлик» кә алғанлиқи, уларниң ичидики хәйкаң ширкитигә охшаш бәзи карханиларниң технологийәси хитайниң уйғурларни тәқиб қилишиға ишлитиливатқанлиқини тәкитлигән. 

Җим банкс мең йүбенниң тәкшүрүлүши керәкликини билдүрүп, «әгәр мән болсам, мең йүбенни дәрһал вәзиписидин елип ташлиған болаттим. . . Һеч болмиса униң хитай компартийәси билән болған мунасивити шундақла калифорнийә аммиви пенсийә фондиниң 2008‏-йили у вәзипигә қоюлуштин бурун вә кейинки хитай ширкәтлиригә мәбләғ селиш әһвали әтраплиқ тәкшүрүлиши керәк иди,» дегән. Лекин америкадики «һелл» гезитиниң хәвәр қилишичә, калифорнийә аммивий пенсийә фондиниң иҗраийә директори марсийә фрост баянат елан қилип, мең йүбенниң арқисида туридиғанлиқини билдүргән.

Пикирләр (0)
Share
Толуқ бәт