Amérika awam palata ezasi jim banks kaliforniye ammiwiy pénsiye fondining Uyghurlarni basturushqa chétishliq xitay shirketlirige meblegh salghanliqini tenqid qildi

Muxbirimiz erkin
2020-02-14
Élxet
Pikir
Share
Print

Amérika awam palata ezasi jim banks kaliforniye waliysi gawin nyuzsamgha mektup yézip, kaliforniye ammiwiy pénsiye fondining Uyghurlarni basturushqa chétishliq xitay téxnologiye shirketlirige meblegh salghanliqini tenqidligen.

Jim banks mektbida pénsiye fondining meblegh ishliri diréktori méng yübén we uning xitay bilen bolghan alaqisidin endishe qiliwatqanliqini ilgiri sürgen. Roytérs agéntliqining bildürüshiche, kaliforniye hökümet xadimlirining pénsiye sistémisi amérikadiki eng chong ammiwiy pénsiye fondi bolup, uning 400 milyard dollar meblighi bar iken. Xitayda tughulup amérika puqraliqigha ötken méng yübén ikki qétm bu wezipige qoyulghan. 1‏-Qétim 2008‏-yili, 2‏-qétim 2019‏-yili 1‏-ayda mezkür fondning mes'ulliqigha teyinlen'gen. 

Jim banksning fokus téléwiziye qanilining ziyaritini qobul qilghanda bildürüshiche, méng yübén mezkur pénsiye fondining 3 milyard 100 milyon dollar meblighini 172 oxshimighan xitay shirkitige salghan. Jim banks kaliforniye waliysi gawén nyuzsamgha yazghan mektubida bu xitay shirketlerning bezilirini amérika hökümitining "Qara tizimlik" ke alghanliqi, ularning ichidiki xeykang shirkitige oxshash bezi karxanilarning téxnologiyesi xitayning Uyghurlarni teqib qilishigha ishlitiliwatqanliqini tekitligen. 

Jim banks méng yübénning tekshürülüshi kéreklikini bildürüp, "Eger men bolsam, méng yübénni derhal wezipisidin élip tashlighan bolattim. . . Héch bolmisa uning xitay kompartiyesi bilen bolghan munasiwiti shundaqla kaliforniye ammiwi pénsiye fondining 2008‏-yili u wezipige qoyulushtin burun we kéyinki xitay shirketlirige meblegh sélish ehwali etrapliq tekshürülishi kérek idi," dégen. Lékin amérikadiki "Héll" gézitining xewer qilishiche, kaliforniye ammiwiy pénsiye fondining ijra'iye diréktori marsiye frost bayanat élan qilip, méng yübénning arqisida turidighanliqini bildürgen.

Toluq bet