Америкадики нопузлуқ гезитләрдин «вал-ситрет журнили» ниң 3 мухбири хитайдин қоғланди

Мухбиримиз ирадә
2020-02-19
Елхәт
Пикир
Share
Принт

Бейҗиң даирилири 19-феврал күни «вал-ситрет журнили» ниң бейҗиңда турушлуқ 3 мухбириниң хизмәт кинишкисини бикар қилип, 5 күн ичидә хитайдин чиқип кетишкә буйруған.

Хитай ташқи ишлар министирлиқи баянатчиси гең шуаң чаршәнбә күнидики баянатида, бу қетимлиқ қарарниң «вал-ситрет журнили» да йеқинда елан қилинған «хитай асияниң һәқиқий кесәл көрписи» намлиқ мулаһизә мақалисигә наразилиқ билдүрүш йүзисидин елинғанлиқини, бу мақалиниң хитай хәлқиниң ғуруриға тәгкәнликини билдүргән. юқиридики бу көз қараш мақалиси америкадики бард университетиниң ташқи сиясәтләр профессори, шундақла бу журналниң истон язғучиси валтир руссл мәд тәрипидин йезилған болуп, униң бу хәвәр мухбирлири билән һечқандақ алақиси йоқкән. «Вал-ситрит журнили» мудири виллиям ливайс бу һәқтики инкасида: «бизниң көз қараш мақалиси сәһипимиз давамлиқ һалда кишиләр қошулидиған яки қошулмайдиған һәрхил көз қараш мақалилирини нәшр қилип туриду. Биз хитай хәлқиниң бу мақалидин нарази болғанлиқидин әпсусландуқ» дегән. Бирақ у йәнә «бизниң журналда көз қараш мақалиси бөлүми билән хәвәр бөлүми ениқ айрилған. Биз хитайниң хәвәр мухбирлиримизни чиқириветиш қараридин әпсусландуқ, уларниң қарарини қайта ойлишишини тәләп қилдуқ» дәп әскәрткән.

Бейҗиң даирилири чиқип кетишини тәләп қилған 3 нәпәр мухбир мәзкур журналниң бейҗиң ишханисиниң муавин мудири җош чин, мухбири чавдең вә филип вен қатарлиқлардин ибарәт.

Җош чин уйғурларға интайин тонушлуқ болған мухбирларниң бири болуп, 2017-2019-йиллири арисида уйғур елигә берип тәкшүрүш әп барған. Униң үрүмчи вә қәшқәр қатарлиқ җайларни биваситә зиярәт қилиш асасида ишлигән «шинҗаңдики он икки күн» мавзулуқ хәвәр мақалиси 2017-йили елан қилинғанда уйғур елидә йолға қоюлған юқири техникилиқ мутләқ назарәт системисини вә қайта тәрбийә лагерлирини дуняға ашкарилашта зор рол ойниған. Униң бу хәвәр программиси 2018-йили ахбарат саһәсидики пидакарлиқ вә җасарәтни тәқдирләш мәқситидә тәсис қилинған «инсан һәқлири ахбарат мукапати» ға еришкән.

Чәтәл хәвәр оргининиң бир қанчә мухбириниң бирла вақитта хизмәт кинишкисини бикар қилиштәк әһвал хитайда 1998-йилидин бери көрүлүп бақмиғаникән. «Хитайдики чәтәллик мухбирлар кулуби» вәқә һәққидики баянатида «хитай һөкүмитиниң бу қетимлиқ һәрикити уларниң чәтәл ахбарат васитилиригә тәһдит селип қорқутуш һәрикитиниң әң ярқин мисали һесаблиниду» дегән.

2015-Йили хитай даирилири уйғур елиниң бай наһийәсидики кан вәқәси һәққидә хәвәр ишлигән фирансуз мухбир урсула готийрни хитайдин чиқиривәткәниди.

Пикирләр (0)
Share
Толуқ бәт