Amérikadiki nopuzluq gézitlerdin "Wal-sitrét zhurnili" ning 3 muxbiri xitaydin qoghlandi

Muxbirimiz irade
2020-02-19
Élxet
Pikir
Share
Print

Béyjing da'iriliri 19-féwral küni "Wal-sitrét zhurnili" ning béyjingda turushluq 3 muxbirining xizmet kinishkisini bikar qilip, 5 kün ichide xitaydin chiqip kétishke buyrughan.

Xitay tashqi ishlar ministirliqi bayanatchisi géng shu'ang charshenbe künidiki bayanatida, bu qétimliq qararning "Wal-sitrét zhurnili" da yéqinda élan qilin'ghan "Xitay asiyaning heqiqiy késel körpisi" namliq mulahize maqalisige naraziliq bildürüsh yüzisidin élin'ghanliqini, bu maqalining xitay xelqining ghururigha tegkenlikini bildürgen. Yuqiridiki bu köz qarash maqalisi amérikadiki bard uniwérsitétining tashqi siyasetler proféssori, shundaqla bu zhurnalning iston yazghuchisi waltir russl med teripidin yézilghan bolup, uning bu xewer muxbirliri bilen héchqandaq alaqisi yoqken. "Wal-sitrit zhurnili" mudiri williyam liways bu heqtiki inkasida: "Bizning köz qarash maqalisi sehipimiz dawamliq halda kishiler qoshulidighan yaki qoshulmaydighan herxil köz qarash maqalilirini neshr qilip turidu. Biz xitay xelqining bu maqalidin narazi bolghanliqidin epsuslanduq" dégen. Biraq u yene "Bizning zhurnalda köz qarash maqalisi bölümi bilen xewer bölümi éniq ayrilghan. Biz xitayning xewer muxbirlirimizni chiqiriwétish qararidin epsuslanduq, ularning qararini qayta oylishishini telep qilduq" dep eskertken.

Béyjing da'iriliri chiqip kétishini telep qilghan 3 neper muxbir mezkur zhurnalning béyjing ishxanisining mu'awin mudiri josh chin, muxbiri chawdéng we filip wén qatarliqlardin ibaret.

Josh chin Uyghurlargha intayin tonushluq bolghan muxbirlarning biri bolup, 2017-2019-yilliri arisida Uyghur élige bérip tekshürüsh ep barghan. Uning ürümchi we qeshqer qatarliq jaylarni biwasite ziyaret qilish asasida ishligen "Shinjangdiki on ikki kün" mawzuluq xewer maqalisi 2017-yili élan qilin'ghanda Uyghur élide yolgha qoyulghan yuqiri téxnikiliq mutleq nazaret sistémisini we qayta terbiye lagérlirini dunyagha ashkarilashta zor rol oynighan. Uning bu xewer programmisi 2018-yili axbarat sahesidiki pidakarliq we jasaretni teqdirlesh meqsitide tesis qilin'ghan "Insan heqliri axbarat mukapati" gha érishken.

Chet'el xewer orginining bir qanche muxbirining birla waqitta xizmet kinishkisini bikar qilishtek ehwal xitayda 1998-yilidin béri körülüp baqmighaniken. "Xitaydiki chet'ellik muxbirlar kulubi" weqe heqqidiki bayanatida "Xitay hökümitining bu qétimliq herikiti ularning chet'el axbarat wasitilirige tehdit sélip qorqutush herikitining eng yarqin misali hésablinidu" dégen.

2015-Yili xitay da'iriliri Uyghur élining bay nahiyesidiki kan weqesi heqqide xewer ishligen firansuz muxbir ursula gotiyrni xitaydin chiqiriwetkenidi.

Toluq bet