Америка ташқий ишлар министирлиқи хитайниң уйғурларға йүргүзүватқан җинайәтлириниң "ирқий қирғинчилиқ" икәнликини қайта тәкитлиди

Мухбиримиз җәвлан
2021-02-24
Share

24-Феврал америка ташқий ишлар министирлиқиниң баянатчиси хитайниң уйғурларға йүргүзүп кәлгән җинайитини "ирқий қирғинчилиқ" вә "инсанийәткә қарши җинайәт" дәп қайта тәкитлигән. Америка ташқий ишлар министирлиқиниң тиветтер һесабида берилгән бу баятта мундақ дейилгән: "биз америка ташқий ишлар министири антони биленкинниң шинҗаңда йүз бериватқан җинайәтләрни ‹ирқий қирғинчилиқ' дәп бекиткәнликини ениқ билимиз. Шундақла биз у җинайәтниң ‹инсанийәткә қарши җинайәт' икәнликиниму билимиз. Рошәнки, башқа дөләт һөкүмәтлириму бу ‹ирқий қирғинчилиқ' җинайитигә йеқиндин диққәт қиливатиду."

Американиң сабиқ ташқий ишлар министири майк помпейо өткән 19-январ хитайниң җинайитини "ирқий қирғинчилиқ" вә "инсанийәткә қарши җинайәт" дәп атиғандин кейин йеңи тәйинләнгән ташқий ишлар министири антони блинкен буни муәййәнләштүргәниди. Антони бленкин йәнә 23-феврал өткүзүлгән бирләшкән дөләтләр тәшкилати кишилик һоқуқ кеңиши йиғинида хитай һөкүмитиниң уйғурларға қарши елип барған җинайитигә сүкүт қилмайдиғанлиқини билдүргән вә уни "қәбиһлик җинайити" дәп атиған.

Хәвәрләрдин мәлум болғинидәк, 22-феврал канада парламенти авам палатаси хитайниң уйғурларға қарши йүргүзгән җинайитини 0 гә қарши 266 аваз билән "ирқий қирғинчилиқ" вә "инсанийәткә қарши җинайәт" дәп бекиткәндин кейин, әнгилийә, голландийә қатарлиқ ғәрб дөләтлиридиму бу мәсилини парламентта күнтәртипкә қоюп, хитайниң җинайитигә ениқлима бериш вә шу асаста хитай билән болидиған сода вә дипломатийә сиясәтлиригә түзитиш киргүзүшни ойлишиветипту.

Көзәткүчиләрниң қаришичә, америка һөкүмити хитайниң җинайитини "ирқий қирғинчилиқ" дәп атиғандин кейин хитай һөкүмити бу һөкүмгә қарши тәшвиқат уруши қозғап, униң хәлқара тәсирини тосушқа җан-җәһли билән урунуп келиватқан иди. Америка ташқий ишлар министириниң б д т кишилик һоқуқ кеңишидә қилған сөзи вә мәзкур министирлик баянатчисиниң юқириқи баяни американиң бу мәсилидики мустәһкәм мәйданини ипадиләп беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт