Amérika tashqiy ishlar ministirliqi xitayning Uyghurlargha yürgüzüwatqan jinayetlirining "Irqiy qirghinchiliq" ikenlikini qayta tekitlidi

Muxbirimiz jewlan
2021-02-24
Share

24-Féwral amérika tashqiy ishlar ministirliqining bayanatchisi xitayning Uyghurlargha yürgüzüp kelgen jinayitini "Irqiy qirghinchiliq" we "Insaniyetke qarshi jinayet" dep qayta tekitligen. Amérika tashqiy ishlar ministirliqining tiwéttér hésabida bérilgen bu bayatta mundaq déyilgen: "Biz amérika tashqiy ishlar ministiri antoni bilénkinning shinjangda yüz bériwatqan jinayetlerni 'irqiy qirghinchiliq' dep békitkenlikini éniq bilimiz. Shundaqla biz u jinayetning 'insaniyetke qarshi jinayet' ikenlikinimu bilimiz. Roshenki, bashqa dölet hökümetlirimu bu 'irqiy qirghinchiliq' jinayitige yéqindin diqqet qiliwatidu."

Amérikaning sabiq tashqiy ishlar ministiri mayk pompéyo ötken 19-yanwar xitayning jinayitini "Irqiy qirghinchiliq" we "Insaniyetke qarshi jinayet" dep atighandin kéyin yéngi teyinlen'gen tashqiy ishlar ministiri antoni blinkén buni mu'eyyenleshtürgenidi. Antoni blénkin yene 23-féwral ötküzülgen birleshken döletler teshkilati kishilik hoquq kéngishi yighinida xitay hökümitining Uyghurlargha qarshi élip barghan jinayitige süküt qilmaydighanliqini bildürgen we uni "Qebihlik jinayiti" dep atighan.

Xewerlerdin melum bolghinidek, 22-féwral kanada parlaménti awam palatasi xitayning Uyghurlargha qarshi yürgüzgen jinayitini 0 ge qarshi 266 awaz bilen "Irqiy qirghinchiliq" we "Insaniyetke qarshi jinayet" dep békitkendin kéyin, en'giliye, gollandiye qatarliq gherb döletliridimu bu mesilini parlaméntta küntertipke qoyup, xitayning jinayitige éniqlima bérish we shu asasta xitay bilen bolidighan soda we diplomatiye siyasetlirige tüzitish kirgüzüshni oylishiwétiptu.

Közetküchilerning qarishiche, amérika hökümiti xitayning jinayitini "Irqiy qirghinchiliq" dep atighandin kéyin xitay hökümiti bu hökümge qarshi teshwiqat urushi qozghap, uning xelq'ara tesirini tosushqa jan-jehli bilen urunup kéliwatqan idi. Amérika tashqiy ishlar ministirining b d t kishilik hoquq kéngishide qilghan sözi we mezkur ministirlik bayanatchisining yuqiriqi bayani amérikaning bu mesilidiki mustehkem meydanini ipadilep béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet