Америка ташқий ишлар министири блинкен хитайниң уйғурларға "ирқий қирғинчилиқ" йүргүзиватқанлиқини йәнә бир қетим тәкитлиди

Мухбиримиз әркин
2021-03-01
Share

Америка ташқий ишлар министири антони блинкен хитайниң уйғурларға "ирқий қирғинчилиқ" қиливатқанлиқини йәнә бир қетим тәкитлигән. Блинкен бу сөзләрни байден һөкүмити ирқий қирғинчилиқ мәсилисидә "арилаш сигнал" бериш билән әйиблиниватқан мәзгилдә қилған. Блинкен 28-феврал канада телевизийә қанили CBC ниң зияритини қобул қилип, мухбирниң бу һәқтики суалиға мундақ җаваб бәргән: "шундақ, мән шундақ дедим. Мән америкаға вакаләтән буни ениқ оттуриға қойдум. Әң муһими президент байденму шундақ деди." бирақ блинкенниң ейтишичә, хитайниң "ирқий қирғинчилиқ" қиливатқанлиқи һәққидә баянат беришни һәр бир дөләтниң өзи қарар бериши керәк икән.

Блинкен бу сөзни CBC мухбириниң канада парламенти хитайниң һәркитини "ирқий қирғинчилиқ" дегәнлики, бирақ һөкүмәтниң техиму тәпсилий учурға еһтияҗлиқ икәнликини қәйт қиливатқанлиқилиқи, униң канадани учур билән тәминләп, хитайда йүз бериватқан ишларниң ирқий қирғинчилиқ икәнликини дәллилишигә ярдәм қилған-қилмиғанлиқи һәққидики суалиға җавабән ейтқан. Блинкен: "һәр бир дөләт вә һөкүмәт буни өзиниң қануни вә әмәлийитигә қарап өзи баһалиши вә қарар қилиши лазим. Биз өзимиз ишәнгәнни ениқ баян қилдуқ. Биз башқа дөләтләрниң бу һәқтә қарар беришигә қараймиз," дегән.

Блинкен хитайға қарши әмәлий тәдбирләрни қоллиниш һәққидә тохтилип, бу тәдбирләр хитайни уйғурларни бастурушқа ишлитидиған техника, техникилиқ мәһсулатлар билән тәминлимәслик, мәҗбурий әмгәк мәһсулатлирини импорт қилмаслиқ қатарлиқ вастиларни өз ичигә алидиғанлиқи, буниң дөләтләр қилалайдиған әмәлий һәрикәтләр икәнликини билдүргән. Блинкенниң тәкитлишичә, "һәрқайсий дөләтләр хитайни қаттиқ тәнқид қилипла қоймай, бәлки йәнә әмәли һәрикәт қоллинишқиму капаләтлик қилиши керәк," икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт