Америка лагерлар мәсилиси сәвәбидин 4 хитай таратқусиниң америкадики хадимлирини қисқартишини тәләп қилди

Мухбиримиз әркин
2020-03-02
Елхәт
Пикир
Share
Принт

Америка ташқи ишлар министирлиқи 2‏-март күни лагерлар мәсилисидә хитай һөкүмитигә болушуп уйғурларни қарилаш тәшвиқати елип бериватқан 4 хитай һөкүмәт таратқусиниң америкадики хадимлирини қисқартишини тәләп қилған.

«Вашингтон почтиси» гезитиниң ашкарилишичә, америка ташқи ишлар министирлиқиниң бир әмәлдари һөкүмәтниң бу қарари хитайниң ахбарат әркинлики вә чәтәл мухбирларни бастурушиға болған әндишисини ипадиләйдиғанлиқини билдүргән. Трамп һөкүмити хитайниң шинхуа агентлиқи, хәлқ гезити, хитай йәршари телевизийә тори, хитай хәлқара радийоси қатарлиқ 4 ахбарат оргининиң америкадики хадимлириниң 40 % ни қисқартишни тәләп қилған. Һалбуки, хитайниң бу 4 һөкүмәт ахбарат оргини лагерлар мәсилисидә хитай һөкүмитигә болушуп, униң тәшвиқатини қилип кәлгән. Бу органлар чәтәлдики уйғурларниң лагердики ата-аниси, уруқ-туғқанлирини телевизорға чиқирип, уларни өзлириниң лагерда әмәслики, тутқун қилинмиғанлиқиға гуваһлиқ бәргүзүп кәлгәниди.

Мәлум болушичә, нөвәттә, бу 4 хитай тәшвиқат аппаратиниң америкида 160 нәпәр хадими бар болуп, уларниң 60 нәпири қисқартилидикән. Америка һөкүмитиниң мәзкур қарари хитай һөкүмити йеқинда «вал стерет журнили» гезитиниң хитайда турушлуқ 3 нәпәр мухбирини чеградин қоғлап чиқирип арқидинла елан қилинди. «Вашингтон почтиси» гезитиниң илгири сүрүшичә, америка ташқи ишлар министирлиқиниң әмәлдари хитайниң «көп йиллардин буян хитайдики америка вә башқа чәтәллик журналистларға қарита қаттиқ назарәт қилиш, паракәндичилик селиш вә қорқутушни йолға қоюп кәлгәнликини билдүрүп: ««президент трамп бейҗиңниң чәтәллик мухбирларға болған чәклимисиниң хата икәнликини ениқ тәкитлиди, шундақла у америкиниң хитай билән болған мунасивәтләрдә өзара җавабкарлиқни сүрүштүридиғанлиқини ениқ оттуриға қойди» дегән.

Пикирләр (0)
Share
Толуқ бәт