Amérika lagérlar mesilisi sewebidin 4 xitay taratqusining amérikadiki xadimlirini qisqartishini telep qildi

Muxbirimiz erkin
2020-03-02
Élxet
Pikir
Share
Print

Amérika tashqi ishlar ministirliqi 2‏-mart küni lagérlar mesiliside xitay hökümitige bolushup Uyghurlarni qarilash teshwiqati élip bériwatqan 4 xitay hökümet taratqusining amérikadiki xadimlirini qisqartishini telep qilghan.

"Washin'gton pochtisi" gézitining ashkarilishiche, amérika tashqi ishlar ministirliqining bir emeldari hökümetning bu qarari xitayning axbarat erkinliki we chet'el muxbirlarni basturushigha bolghan endishisini ipadileydighanliqini bildürgen. Tramp hökümiti xitayning shinxu'a agéntliqi, xelq géziti, xitay yershari téléwiziye tori, xitay xelq'ara radiyosi qatarliq 4 axbarat orginining amérikadiki xadimlirining 40 % ni qisqartishni telep qilghan. Halbuki, xitayning bu 4 hökümet axbarat orgini lagérlar mesiliside xitay hökümitige bolushup, uning teshwiqatini qilip kelgen. Bu organlar chet'eldiki Uyghurlarning lagérdiki ata-anisi, uruq-tughqanlirini téléwizorgha chiqirip, ularni özlirining lagérda emesliki, tutqun qilinmighanliqigha guwahliq bergüzüp kelgenidi.

Melum bolushiche, nöwette, bu 4 xitay teshwiqat apparatining amérikida 160 neper xadimi bar bolup, ularning 60 nepiri qisqartilidiken. Amérika hökümitining mezkur qarari xitay hökümiti yéqinda "Wal stérét zhurnili" gézitining xitayda turushluq 3 neper muxbirini chégradin qoghlap chiqirip arqidinla élan qilindi. "Washin'gton pochtisi" gézitining ilgiri sürüshiche, amérika tashqi ishlar ministirliqining emeldari xitayning "Köp yillardin buyan xitaydiki amérika we bashqa chet'ellik zhurnalistlargha qarita qattiq nazaret qilish, parakendichilik sélish we qorqutushni yolgha qoyup kelgenlikini bildürüp: ""Prézidént tramp béyjingning chet'ellik muxbirlargha bolghan cheklimisining xata ikenlikini éniq tekitlidi, shundaqla u amérikining xitay bilen bolghan munasiwetlerde öz'ara jawabkarliqni sürüshtüridighanliqini éniq otturigha qoydi" dégen.

Toluq bet