Америка авам палата әзаси тәд йоһу: «шәрқий түркистан бесивелинған земин»

Мухбиримиз әркин
2020-03-13
Елхәт
Пикир
Share
Принт

Америка авам палатасиниң җумһурийәтчи әзаси тәд йоһу 12-март күни авам палатасида сөз қилип, «шәрқий түркистанниң бесивелинған земин» икәнликини билдүргән. Тәд йоһу сөзидә, хитайниң мәркизи асия райони болған «шәрқий түркистан» ниң йүз нәччә йил аввал хитай тәрипидин бесивелинип кейин компартийә тәрипидин өткүзүвелинғанлиқи, униң исминиң «йеңи земин» дегән мәнидики «шинҗаң», дәп өзгәртилгәнликини илгири сүргән. Тәд йоһуниң хитай һөкүмити уйғурларниң тарихта мустәқил дөләтләрни қурғанлиқини инкар қилип, уйғурларни әзәлдин «җоңхуа миллитиниң парчиси» дегәнни күчлүк тәрғип қиливатқан бир вақитта бу сөзләрни қилиши алаһидә диққәт қозғиди.

Бу бир америка авам палата әзасиниң тунҗи қетим америка дөләт мәҗлисидә хитайниң мәзкур райондики болған игилик һоқуқ тәлипигә суал қоюп, бу земинниң бесивелинғанлиқини илгири сүришидур. 

Тәд йоһу сөзидә, «мениң бу мәсилини күнтәртипкә елип келишимдики сәвәп, чүнки бу земин хитайниң бастурушиға учраватқан мусулман уйғур, қирғиз қатарлиқ хәлқләрниң зиминидур» дегән. У йәнә хитайда җаза лагерлириниң қурулуп, бу лагерларда қорқунчлиқ ишларниң йүз бериватқанлиқи, буниң һәқиқәт икәнлики тоғрисида йетәрлик пакитларниң барлиқи, хитайниң шәрқий түркистандики бир милйондин артуқ уйғур вә башқа түркий хәлқләрни аталмиш «қайта-тәрбийәләш лагерлири» ға қамиғанлиқи, лекин бу орунларниң «қайта-тәрбийәләш лагерлири әмәслики» ни билдүргән. У хитай һөкүмитиниң бу лагерларниң әтрапиға җәсәт көйдүрүш завутлирини қурғанлиқи, өзиниң авам палатаси ташқий ишлар комитетиниң бир қетимлиқ гуваһлиқ йиғинида, немә үчүн бу орунларда җәсәт көйдүрүш завутлириниң қурулғанлиқиға суал қойғанлиқини тәкитлигән. 

Тәд йоһу йәнә хитайниң мәһбусларниң ички әзалирини елишни давамлаштуриватқанлиқи, нөвәттә уйғур тутқунлири нәччә милярд долларлиқ бу содиниң зиянкәшлик нишаниға айланғанлиқиға даир доклатларниң елан қилинғанлиқини билдүргән.

Пикирләр (0)
Share
Толуқ бәт