Америка хәлқара диний әркинлик комитетиниң рәиси гәйл маншин: "хитайниң мени җазалишидин иптихарландим"

Мухбиримиз әркин
2021-03-29
Share

Америка хәлқара диний әркинлик комитетиниң рәиси гейл маншин хитайниң уйғурларға тутқан муамилисини тәнқид қилғанлиқи үчүн җазаланғанлиқидин "иптихарланғанлиқи" ни билдүргән. Ройтерс агентлиқиниң хәвәр қилишичә, гейл маншин 27-март баянат елан қилип, хитай һөкүмитиниң униңға имбарго йүргүзгәнликигә инкас билдүргән. Хитай һөкүмити 27-март гейл маншин вә шуниңдәк америка хәлқара диний әркинлик комитетиниң муавин рәиси тони перкенсни өз ичигә алған бир қанчә америка вә канада әмәлдарлириға имбарго қойғанлиқини җакарлиған иди.

Гейл маншин баянатида "мән коммунистик хитайниң бу дөләттики диний вә етник аз санлиқ милләтләргә қарита садир қилған ирқий қирғинчилиқ җинайитини паш қилип җазаланғанлиқимдин иптихарлиқ һес қилимән" дегән. Униң көрситишичә, униң "бу йил язда хитайни зиярәт қилиш пилани йоқ" икән, шундақла у "хитайда йүз бәргәндәк диний әркинликкә қорқунчлуқ дәриҗидә дәхли-тәруз қилиш һәрикәтлирини сөзләштин тохтап қалмайдикән." хәлқара диний әркинлик комитетиму 29-март куни баянат елан қилип, хитайниң гәйл маншин билән тони перкенсқа имбарго қойғанлиқини тәнқид қилған.

Мәзкур комитет 29-март баянат елан қилип: "хитай һөкүмитиниң садир қиливатқан ирқий қирғинчилиқи вә инсанийәткә қарши җинайитигә қарши сөзләшни һәргизму тохтитип қоймайдиғанлиқи" ни билдүргән. Баянатта тәкитлишичә, "шинҗаңдики вәһшийлик вә компартийәниң ирқий қирғинчилиқиға қарита тәрәпсиз хәлқаралиқ тәкшүрүш елип берилиши һәмдә 2022-йилдики бейҗиң олимпик мусабиқисини йөткәш яки байқут қилиш үчүн хәлқаралиқ тиришчанлиқ көрситилиши керәк" икән. Хитай һөкүмити 27-март гейл маншин, тони перкенс қатарлиқларға имбарго қоюшниң алдида америка, канада, явропа иттипақи вә әнгилийә хитайниң уйғур елидики 4 нәпәр әмәлдари вә бир аппаратини җазалиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт