Америка дөләт мәҗлиси әзалири хитайниң уйғурларға йүргүзүватқан зулумлирини "интайин йиргинишлик" деди

Мухбиримиз ирадә
2021-04-01
Share

Америка дөләт мәҗлисиниң җумһурийәтчиләр партийәсидин болған әзаси майкел валтиз хитайниң уйғурларға йүргүзиватқан зулумлири "интайин йиргинишлик" дегән.

У йеқинда "хәвәрләр һәптилики" жорнилиниң зияритини қобул қилип: "хитай һөкүмитиниң уйғурларға тутқан муамилиси илгири риванда, судан, боснийә вә натсистлар германийәсидә йүз бәргән миллий қирғинчилиққа охшайду," дегән.

Америка дөләт мәҗлисиниң әзаси майкил валтиз йәнә мундақ дегән: "бир милләтни йәр йүзидин йоқитиш үчүн, шу милләтниң әвлат қалдурушиниң алдини елиш вә кәң көләмлик басқунчилиқ һәрикити йүргүзүп уларниң генлирини бузушни пиланлаш, интайин йиргинишлик бир иш."

Майкил валтиз сөзидә хитай һөкүмитиниң нөвәттә өзиниң зор иқтисадий күчидин пайдилинип туруп, америка ширкәтлириниң ирқий қирғинчилиққа қарши сөз қилишини тосушқа урунуватқанлиқиниму әйиблигән. Шуниң билән биргә у йәнә өзиниң көп қетим хәлқара олимпик комитетидин 2022-йиллиқ қишлиқ олимпик тәнһәрикәт мусабиқисини башқа дөләткә йөткәшни тәләп қилғанлиқини ейтқан. У йәнә: "бундақ дөләттә олимпик мусабиқиси өткүзүш хәлқара олимпик комитетиниң әхлақ қаидисигә хилап, биз NBC телевизийә қанилидинму бейҗиң қишлиқ олимпик мусабиқисни телевизорда тарқатмаслиққа чақиримиз. Мусабиқиниң ярдәм бәргүчи орунлириниму өзиниң мәблиғини тартивелишқа чақиримиз," дегән.

Шу күни йәнә америка дөләт мәҗлисиниң демократлар партийәсидин болған вәкили кириссий холаханму бу һәқтә ипадә билдүрүп, хитай б д т хәвпсзлик кеңишиниң әзаси болғанлиқтин, б д т дин зор үмид күтүш мумкин әмәс, шуңлашқа америка вә униң муһим иттипақдаш дөләтлириниң бу мәсилидики позитсийәси интайин муһим, дәп көрсәткән. У шундақла хәлқаралиқ чоң ширкәтләрни уйғур мәсилисидә ипадә билдүрүшкә чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт