Америка ташқи ишлар министирлиқи хитайни уйғурларға қаритилған бастурушни тохтитишқа чақириқ қилди

29-Май күни америка ташқи ишлар министирлиқиниң баянатчиси морган ортагус мәхсус сөз қилип, хитай һөкүмитини лагерлардики уйғурларни тездин қоюветишкә чақириқ қилди.

У сөзидә рамизан ейи ахирлишип, роза һейти йеқинлап келиватқан мушундақ бир алаһидә мәзгилдә хитай һөкүмитиниң уйғурларни зор көләмдә бастуруш һәрикитини һәргизму қобул қилғили болмайдиғанлиқини, америка һөкүмитиниң бир милйондин артуқ уйғурниң һечқандақ сәвәбсизла тутқун қилинишидәк паҗиәдин бәкму әндишигә чүшкәнликини, лагерлардики қийнақлар һәққидә түрлүк учурларниң көпләп мәлум болуватқанлиқини алаһидә тәкитлиди.

Морган ханим сөзиниң давамида хитай һөкүмитиниң уйғурларни бастуруш һәрикитидә уйғурларни өзлириниң миллий кимлики вә ислам етиқадидин ваз кечишкә мәҗбурлаватқанлиқини, уйғурлар үчүн муқәддәс һесаблинидиған рамизан ейи мәзгилидә болса уйғурларниң әң зор хорлиниш вә қийнақларға дуч келиватқанлиқини, шуңа бу һалға тездин хатимә берип, лагерлардики барлиқ тутқунларниң аилисидикиләр билән җәм болушиға һәмдә һейт хошаллиқидин бирликтә бәһримән болушиға йол қоюшқа чақириқ қилди.