Мит ромней билән бен микадамс хитайниң уйғурларни мәҗбурий туғмас қилишиға қарита имбарго йүргүзүшни тәләп қилди

Мухбиримиз әркин
2020-07-10
Елхәт
Пикир
Share
Принт

Америка кеңәш палата әзаси мит ромней билән авам палата әзаси бен микадамс 9-июл күни америка һөкүмитини хитай даирилириниң уйғур аяллирини мәҗбурий туғмас қилиш қилмишиға қарита имбарго йүргүзүшкә чақирған.

Американиң ютаһ шитатидики клс ториниң хәвәр қилишичә, мит ромней 9-июл баянат елан қилип, «хитай компартийәси уйғур аилилирини йоқитиш вәзиписини өтәватиду. Уйғур аяллирини мәҗбурий туғмас қилиш тоғрисидики дәлилләр пәвқуладдә қәбиһ. Биз һөкүмәтни бу вәһшиликниң характерини рәсмий бекитип, җавапкарларға җаза қоюшини тәләп қилимиз,» дегән. 

Мит ромней бу чақириқни америка ташқий ишлар министирлиқи хитайниң уйғур аптоном районлуқ парткомниң секритари чен чүәнгони өз ичигә алған 4 нәпәр әмәлдариға имбарго қойғанлиқини елан қилған күни оттуриға қойған. Америка ташқий ишлар министири майк помпейо 9-июл америка малийә министирлиқиниң чен чүәнго, ваң миңшән, җу хәйлун, хо люҗүн қатарлиқ 4 нәпәр хитай әмәлдари вә уйғур аптоном районлуқ җ х назаритигә имбарго йүргүзгәнликини җакарлиған иди.

Клс ториниң билдүрүшичә, мит ромней билән бен микадамс йәнә америка кеңәш вә авам палаталириниң 78 нәпәр әзасиниң йеқинда америка ташқий ишлар министири помпейо билән малийә министири минучинға язған мәктубиғиму имза қойған. Униңда «хитайниң уйғур аяллириға қаратқан зораванлиқи, шундақла шинҗаң уйғур аптоном районидики уйғур нопусиниң көпийишини мәҗбурий тосушқа урунуш қилмишиға даир дәлилләр американиң күчлүк йетәкчилики вә хәлқара һәрикәтни тәләп қилидиғанлиқи» тәкитләнгән иди.

Пикирләр (0)
Share
Толуқ бәт