Mit romnéy bilen bén mik'adams xitayning Uyghurlarni mejburiy tughmas qilishigha qarita imbargo yürgüzüshni telep qildi

Muxbirimiz erkin
2020-07-10
Share

Amérika kéngesh palata ezasi mit romnéy bilen awam palata ezasi bén mik'adams 9-iyul küni amérika hökümitini xitay da'irilirining Uyghur ayallirini mejburiy tughmas qilish qilmishigha qarita imbargo yürgüzüshke chaqirghan.

Amérikaning yutah shitatidiki kls torining xewer qilishiche, mit romnéy 9-iyul bayanat élan qilip, "Xitay kompartiyesi Uyghur a'ililirini yoqitish wezipisini ötewatidu. Uyghur ayallirini mejburiy tughmas qilish toghrisidiki deliller pewqul'adde qebih. Biz hökümetni bu wehshilikning xaraktérini resmiy békitip, jawapkarlargha jaza qoyushini telep qilimiz," dégen. 

Mit romnéy bu chaqiriqni amérika tashqiy ishlar ministirliqi xitayning Uyghur aptonom rayonluq partkomning sékritari chén chüen'goni öz ichige alghan 4 neper emeldarigha imbargo qoyghanliqini élan qilghan küni otturigha qoyghan. Amérika tashqiy ishlar ministiri mayk pompéyo 9-iyul amérika maliye ministirliqining chén chüen'go, wang mingshen, ju xeylun, xo lyujün qatarliq 4 neper xitay emeldari we Uyghur aptonom rayonluq j x nazaritige imbargo yürgüzgenlikini jakarlighan idi.

Kls torining bildürüshiche, mit romnéy bilen bén mik'adams yene amérika kéngesh we awam palatalirining 78 neper ezasining yéqinda amérika tashqiy ishlar ministiri pompéyo bilen maliye ministiri minuchin'gha yazghan mektubighimu imza qoyghan. Uningda "Xitayning Uyghur ayallirigha qaratqan zorawanliqi, shundaqla shinjang Uyghur aptonom rayonidiki Uyghur nopusining köpiyishini mejburiy tosushqa urunush qilmishigha da'ir deliller amérikaning küchlük yétekchiliki we xelqara heriketni telep qilidighanliqi" tekitlen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet