Amérikaning Uyghur diyaridiki 4 xitay emeldarigha imbargo qoyushi xelqara taratqularning küchlük inkasini qozghidi

Amérika hökümitining 9-iyul küni chén chüen'go qatarliq xitayning Uyghur diyaridiki 4 neper emeldarigha imbargo qoyushi xelqara taratqularda küchlük inkas qozghidi.

BBC Ning xewiride xitayning Uyghur we bashqa milletlerni keng kölemlik tutqun qilish, diniy basturush we mejburiy tughmas qiliwétish bilen eyiblengenliki, xitay kompartiyesi siyasi byurosining ezasi bolghan chén chüen'goning hazirgha qeder amérika imbargo qoyhan eng yuqiri derijilik xitay emeldari ikenlikini bildürgen. 

CNN Ning bu heqtiki xewiride tramp hökümitining xitay emeldarlirigha ularning “Shinjang rayonidiki Uyghur musulmanlirini we bashqa az sanliq topluqlarni tutqun qilish, qiyin-qistaqqa élishqa ishtirak qilghanliqi seweblik qarshi heriket qollan'ghanliqi” tekitlengen. “Washin'gton pochtisi” gézitining xewiride tekitlishiche, “Yuqiri derijilik (xitay) emeldarlirining amérikagha kirishini cheklesh qarari tramp hökümitining xitay bilen korona wirusi yuqumi, kishilik hoquq, xongkong we soda mesililiridiki munasiwiti yamanliship ketken mezgilde alghan bir qatar jiddiy heriketlirining eng yéngisi,” iken

“Nyu-york waqti géziti” ning bu heqtiki xewiride bu qararning “Shinjangda yüz minglighan musulman étnik milletler tutqun qilinip, lagérlargha qamalghan siyasetning tüzülishi we ijra qilinishida halqiliq rol oynighan xitay emeldarlarni nishan qilghanliqi” tekitlengen. “El-jezire” ning xewiride amérika kéngesh palata ezasi marko rubiyoning bu qararning “Xéli uzun waqit kéchikkenliki” we “Téximu köp tedbirlerning élinishi kérekliki” ni bildürgenliki tektilengen. Amérika tashqiy ishilar ministirliqi 9-iyul chén chüen'go, wang mingshen, ju xeylun we xo lyujün qatarliq xitayning Uyghur diyaridiki 4 neper emeldarigha imbargo qoyghanliqini élan qilghan idi.