Robért obrayin: "Tramp xitay hökümitini Uyghurlargha qarshi herikiti seweblik dawamliq jazalaydu"

Muxbirimiz erkin
2020-07-13
Élxet
Pikir
Share
Print

Amérika dölet xewpsizliki meslihetchisi robért obrayin 12-iyul "Washin'gton pochtisi" gézitide maqale élan qilip, prézidént trampning xitay hökümitini Uyghurlargha qarshi herikiti seweblik dawamliq jazalaydighanliqini bildürgen.

Robért obrayin maqaliside tramp hökümitining yéqinqi künlerdiki herikiti bu depsendichilikke qatnashqan xitay emeldarlirining amérikagha kirishini tosush qatarliqlarni öz ichige alghanliqini bildürgen. U, prézidént trampning yene Uyghurlarni mejburiy emgekke sélip ishlepchiqirilghan mehsulatlarning qanunsiz import qilinishini tosushqa heriket qilghanliqi, "Bu xil kishilik hoquq depsendichiliki dawamlashsila tramp hökümitining buninggha jawab qayturidighanliqi" ni bildürgen.

Robért obrayinning tektilishiche, xitay kompartiyesining pelsepeside shexsning héchqandaq qimmiti yoq bolup, uning nezeride "Shexs peqet kolléktip milliy döletning meqsitige yétishtiki qorali" iken. U "Bu pelsepe xitay kompartiyesining pütün shinjangdiki Uyghur we bashqa türkiy musulmanlargha qaratqan qorqunchluq basturushini chüshinishke yardem béridighanliqi" ni tekitligen.

Robért obrayin maqaliside xitay kompartiyesi musulmanlarni lagérlargha qamapla qalmay, shinjangni saqchi dolitige aylandurup, kishilerni yuqiri téxnika arqiliq teqipligenligenliki, DNA ewrishkisini yighip, Uyghur erkeklirini lagérlargha qamighanliqi, a'ililirige xitay kadirlirini orunlashturup, balilarni yitimxanilargha yötkigenliki, meschidlerni chéqip, "Qur'an" ni qayta sherhileshke kirishkenlikini tekitkigen. U yene yéqinqi doklatlarda xitay kompartiyesining Uyghur ayallirigha qarita tughut kontroli, mejburiy tughmas qilish, bala chürüsh, basqunchiliq wastilirini ishlitip, shinjang Uyghur aptonom rayonining nupusini özgertiwatqanliqi qeyt qilin'ghanliqini bildürgen.

U maqalisining axirida "Eger ötken esir bizge bir nerse körsitip bergen bolsa, u küchlük döletler qollighan xeterlik idé'ologiyelerning yaman gherezlik herikitining öz chörisi ichide cheklinip qalmaydighanliqidur. Shuning üchün amérika Uyghurlargha we bizge shinjangdiki heqiqiy ehwalni ashkarilashni dawamlashturidu," dégen.

Toluq bet