Морган ортагус: «дипломатлиримизниң шинҗаңда ким билән учришишни халиса, шуниңға йол қоюлуши керәк»

Мухбиримиз әркин
2020-07-20
Елхәт
Пикир
Share
Принт

Америка ташқи ишлар министирлиқи баянатчиси морган ортагус ханим 20-июл хитайға твиттерда инкас қайтуруп, хитайда турушлуқ америка дипломатлириниң тибәт вә уйғур дияриға әркин зиярәт қилиши вә ким билән учришишни халиса шуниң билән учришишиға йол қоюши керәкликини билдүрди. Ортагус ханим бу сөзләрни хитай ташқи ишлар министирлиқи баянатчиси хуа чүнйиңниң өткән һәптә елан қилған америка ташқи ишлар министири помпейониң «шинҗаңни зиярәт қилишини қарши алидиғанлиқи» һәққидики баянатиға қарита ейтқан.

Морган ортагус инкасида америкадики блумберг агентлиқиниң бу һәқтики хәвирини қошуп тивиттер қилди. Хуа чүнйиң өткән һәптики баянатида майк помпейоға һуҗум қилған. У майк помпейони уйғур мәсилисидә «ялған» сөзләш билән әйибләп, «әгәр помпейо әпәнди сәмимий болса униң шинҗаңни зиярәт қилип, кишиләр билән сөзлишип беқишини вә шинҗаңдики кишиләрниң униң һәққидә қандақ ойлайдиғанлиқини һес қилип беқишини қарши алимиз» дегән. Лекин ортагус ханим 20-июл униңға қайтурған инкасида, хитайниң уйғур дияри вә тибәткә бундақ көп чәклимә қоюшида немини йошурмақчи болуватқанлиқиға соал қойди.

У инкасида: «бизниң хитайда дипломатлиримиз бар, худди силәрниң дипломатлириңлар америкада әркин йүргәндәк уларниңму шинҗаң вә тибәтни саяһәт қилип, ким билән көришишни халиса шуниң билән көрүшүшигә йол қоюлсун. Немә үчүн бундақ көп чәклимә қоюлиду?, силәр немини йошурмақчи?» дегән. Хитай һөкүмити башқа дөләт әмәлдарлириниң уйғур диярида зиярәттә болушини қарши алидиғанлиқини тәкитләп кәлгән болсиму, лекин униңға шәрт қоюп, уларниң халиған җайни зиярәт қилишини рәт қилип кәлгәниди.

Пикирләр (0)
Share
Толуқ бәт