Америка һөкүмити америка тиҗарәт вә киночилиқ саһәсини уйғур елидики зулумға диққәт қилишқа чақирмақта

Мухбиримиз ирадә
2020-07-23
Елхәт
Пикир
Share
Принт

Америка һөкүмити америкадики тиҗарәт саһәсини уйғур елидики зулумға һәрқандақ бир шәкилдә шерик болуп қалмаслиққа чақирмақта. Улар йеқинда елан қилған ««шинҗаңдики сода тәминат зәнҗири һәққидә тәвсийә» ни охшимиған мунбәрләрдә чүшәндүрүш арқилиқ америка тиҗарәт саһәси вә һоллийвудқа қаратқан чақириқлирини күчәйтти.

Америка ташқи ишлар министирлиқиниң баянатчиси морган ортагус ханим 22-июл күни «фокс» хәвәрләр қанилида қилған сөзидиму бу мәсилини қайта әскәртти.

У мундақ деди: «биз йеқинда америка тиҗарәтчилирини хитайдики мәҗбурий әмгәк лагерлириға четилип қалмаслиқ һәққидә агаһландурдуқ. Америка тиҗарәт саһәси, һоллийвуд вә америка җамаити шинҗаңда йүз бериватқан вә биз иккинчи дуня урушидин бери көрүп бақмиған бу йиргинишлик кишилик һоқуқ дәпсәндичиликини тонуп йетиши керәк.»

1-Июл күни америка ташқи ишлар министирлиқи, хәзинә министирлиқи, сода министирлиқи вә дөләт хәвпсизлик министирлиқи бирликтә «шинҗаңдики сода тәминат зәнҗири һәққидә тәвсийә» намлиқ бирләшмә қарарни елан қилип, хитай билән сода қиливатқан америка ширкәтлирини уйғур дияридики мәҗбурий әмгәккә четишлиқ болуш еһтимали болған һәрқандақ тәминат зәнҗирлиридин һошяр болушқа чақирған иди. Униң арқидинла америка сода министирлиқи йәнә «хотән хавлин чач мәһсулатлири завути», «нәнҗиң тоқумичилиқ гуруһи», «нәнчаң филим технологийәси» қатарлиқ 11 ширкәт вә завутни «қара тизимлик» кә киргүзгән иди.

Нөвәттә хитай билән тиҗарәт қиливатқан чоң типтики америка ширкәтлири вә һәрқайси даңлиқ маркилар үстидики бесим күнсайин күчәймәктә.

Пикирләр (0)
Share
Толуқ бәт