Miras fondi: amérikining Uyghurlar üchün meydan'gha chiqidighan waqti keldi

Muxbirimiz shöhret hoshur
2018-07-27
Élxet
Pikir
Share
Print

Amérikidiki nopuzluq tetqiqat orunliridin biri bolghan miras fondi ‏(Heritage Foundation) ning yash rehberler guruppisining ezasi brayn haylikér bilen oliwiya énos bügün washin'gtondiki "Kündilik signal" namliq axbarat torida maqale élan qilip, amérikining Uyghurlar üchün otturigha chiqip gep qilidighan waqti kelgenlikini ilgiri sürdi.

"Kömülüp qalghan insan heqliri krizisi ashkarilandi" dégen mawzuda yézilghan bu maqalida, xitayning Uyghur rayonida "Öyide turuwélish" xizmitini qanat yaydurup bir milyon kadirni Uyghurlarning öylirige yerleshtürgenliki heqqide mexsus toxtalghan. Öylerge yerleshtürülgen xitay kadirlarning a'ile ezaliri yighiwélish lagérlirigha ekétilgen öylerde yétip-qopup öy ichidikilerni nazaret qilipla qalmastin, ulargha islam dinini ziyanliq dep chüshendürüwatqanliqi we islami étiqadning ornigha shi jinping idiyisini zorlap singdürüwatqanliqi bayan qilin'ghan.

Uyghurlardiki a'ile ezaliri yighiwélish lagérigha ekitilish, ösmür balilar daril'étamlargha toplinish, kadirlar öylirige kélip yétiwélish qatarliq ehwallarning bügün'giche dunyagha ashkarilanmay kelgen bir insan heqliri krizisi ikenliki ilgiri sürülgen maqalida, dunyada erkinlikni qoghdashning amérikining en'eniwi wezipisi ikenliki, emdi amérikining Uyghurlar üchün otturigha chüshüp gep qilidighan waqitning yétip kelgenlikini bayan qilghan. Maqalida yene amérika hökümiti xitayni eger mezkur insan heqliri krizisi dawam qilghan teqdirde buning bir bedili bolidighanliqi heqqide agahlandurushqa chaqirilghan. 

Melum bolushiche miras fondi 1973 ‏-yili qurulghan bolup hazirgha qeder amérikining tashqi siyaset we dölet bixeterlik siyasitining belgilinishide muhim rol oynap kelmekte.

Toluq bet