Америка кеңәш палата рәиси митч макконел уйғур елини «гулаг» қа охшатти

Мухбиримиз ирадә
2019-08-22
Елхәт
Пикир
Share
Принт

Америка сиясәт сәһнисидики муһим ғоллуқ шәхсләрниң бири, америка кеңәш палата рәиси митч макконел дуняниң америка билән бир сәптә туруп, хитайға қарши туруши керәкликини билдүрди.

Сенатор митч макконел америкадики нопузлуқ журналлардин «вол-ситрит журнили» да «биз хоңкоң билән бир сәптә» мавзулуқ бир парчә мақалә елан қилип, дуняниң ахири берип хоңкоңлуқ намайишчилар һазир қиливатқандәк хитай һөкүмити билән тиркишиштәк ақивәт билән йүзлишидиғанлиқини билдүргән.

У мақалисидә хоңкоңлуқларниң өз әркинликини қоғдап қелишни, аптономийәсиниң һөрмәт қилинишини вә бихәтәрлик қисимлири тәрипидин қолға елинғанларға адаләт тәләп қилип намайиш қиливатқанлиқини, буниң һәргизму компартийә тәшвиқатида ейтилғандәк чәтәл һөкүмәтлири бирлишип қилған суйиқәст әмәсликини, йүз бериватқан намайишларниң бирдин-бир җавабкариниң дәл бейҗиң һөкүмити өзи икәнликини тәкитлигән.

Сенатор митч макконел мақалисидә хитай һөкүмитиниң һакиммутләқ тарихиға намда аптономийә дәп аталған, әмәлийәттә униңдин әсәрму болмиған уйғур елини вә тибәтни мисал кәлтүргән.

Митч макконел уйғур ели һәққидә мунуларни баян қилған: «мусулман хәлқлирини асас қилған шинҗаң районида хитай һөкүмити уйғур нопусини йөткәш усулини қолланған, уларни иҗтимаий вә сиясий җәһәттин қаттиқ қамал астиға алған шундақла йәнә тутуп туруш лагерлирини йолға қойған. Шинҗаң бир аптоном район әмәс, бәлки у бир заманиви ‹гулаг' дур.»

Сенатор митч макконел мақалисидә мәйли тибәт болсун мәйли уйғур ели болсун, һәр иккилисидә хитай һөкүмитиниң йиллардин бери системилиқ һалда бесим сияситини чиңитип кәлгәнликини тәкитлигән.

У мақалисидә дуня хитайниң зомигәрләрчә сиясий вә тиҗарий паалийәтлирини тонуп йетиватқан бир шараитта буниңға ялғуз американиң тақабил турушини күтүп турса болмайдиғанлиқини тәкитлигән. У мақалисидә «тиҗарәт билән шуғуллинидиған, хусусий әркинликни яқилайдиған һәрбир демократик дөләтниң бу мәсилидә мәсулийити бар, улар америка билән хитай арисида таллаш елип бармайду. Бәлки улар адил болған хәлқаралиқ система билән хитай орнатмақчи болуватқан ички бесим, назарәт вә беқиндичилиқ түзүми арисида таллаш елип бариду» дәп әскәрткән.

У йәнә америка һөкүмитиниму әгәрдә хитай хоңкоңдики намайишларни бастурған тәқдирдә хитайниң еғир ақивәтләргә қалидиғанлиқини ениқ вә кәскин қилип ипадә қилиши керәкликини билдүргән.

Америка кеңәш палата рәиси, сенатор митч макконел американиң муавин президенти майк пәнс, ташқи ишлар министири помпейо вә америка авам палата рәиси нәнси плосидин кейин уйғур елидики лагерлар мәсилисини тилға елип, хитай һөкүмитиниң хәлқараниң адаләт системисиға селиватқан тәһдити үстидә тохталған йәнә бир нопузлуқ дөләт әрбаби болуп һесаблиниду.

Пикирләр (0)
Share
Толуқ бәт