Nyuyork waqti géziti: "Yawropa shirketliri 'xitayning ochuq türmisi' din zor paydigha érishmekte"

Muxbirimiz erkin
2019-08-23
Élxet
Pikir
Share
Print

Mérkator instituti xitay tetqiqat programmisining tetqiqatchisi bénjamin xa'as 22‏-awghust küni "Nyuyork waqti" gézitide maqale élan qilip, yawropa ittipaqini Uyghur rayonigha meblegh salghan yawropa shirketlirini kontrol qilishqa chaqirdi. Bénjamin xa'asning ilgiri sürüshiche, yawropa ittipaqi derhal qanun chiqirip, Uyghur rayonidiki yawropa shirketlirining bu rayonda yüz bériwatqan kishilik hoquq depsendichilikige chétilip qalghan-qalmighanliqini tekshürüp turushi kérek iken.

Maqalide, bu shirketlerning yighiwélishi lagérliridiki mejburi emgekke chétilip qalmasliqi, bu shirketlerning meblighining qaysi organlargha payda yetküzüwatqanliqi, mehsulati we téxnikisining qeyerge ishlitiliwatqanliqini nazaret qilip, yawropa kishilik hoquq ölchimige xilapliq qilghan shirketlerni jazalash kérekliki tekitlen'gen. Bénjamin xa'as "Yawropa shirketliri 'xitayning ochuq türmisi'din zor paydigha érishmekte" serlewhilik maqaliside qeyt qilishiche, nöwette, yawropadiki eng chong 150 shirketning yérimining dégüdek Uyghur rayoni bilen melum shekildiki soda munasiwiti bar iken. 

Maqalide, bu shirketlerning ichide gérmaniye ziminis shirkitining eng aldinqi orunda turidighanliqi, uning xitay éléktronluq pen-téxnika guruhi bilen hemkarliship, Uyghur rayonida ishlitiliwatqan bir saqchi yumtalini yasap chiqqanliqi, bu yumtal nurghun Uyghurlarning lagérlargha qamilishigha seweb bolghanliqi bildürülgen. Bénjamin xa'asning qarishiche, yawropa ittipaqining yuqiriqi tedbirlerni qollinishi xitayning naraziliqini qozghisimu, lékin xitay re'isi shi jinping xitayning eng chong soda shériki bolghan yawropa ittipaqi bilen bu siyasiy ixtilapni, dep özining iqtisadi muqimliqigha buzghunchiliq qilishqa tewekkül qilalmaydiken.

Toluq bet