Америка һөкүмити: “хитай һазир шинҗаң һәққидики учурларни контрол қилишқа урунмақта!”

Мухбиримиз әзиз
2022.08.25
Share on WhatsApp
Share on WhatsApp

Америка ташқий ишлар министирлиқи 24-авғустта мәхсус доклат елан қилип, хитай һөкүмитиниң дуня миқясидики охшимиған сорунларда давам қиливатқан уйғурлар һәққидики баянларни өз пайдисиға бурашқа урунуватқанлиқини тәнқидлигән. Доклатта хитай һөкүмитиниң бу мәқсәдкә йетиш үчүн “чилбөрә дипломатийәси”, чәт әл ахбаратлири вә иҗтимаий таратқулар дегәнләрдин пайдиланған һалда, уйғур дияри һәққидики “иҗабий” учурларни тор бошлуқиға төкмә қилип, җамаәт пикрини контрол қилишқа урунуватқанлиқи тәпсилий шәрһийләнгән.

Доклатта көрситилишичә, хитай һөкүмити һәмдә улар арқа терәк болуватқан ширкәт вә шәхсләр “инчикилик билән лайиһиләнгән тиришчанлиқ” арқилиқ америка һөкүмитиниң “уйғурлар ирқий қирғинчилиққа учраватиду” дәп елан қилған һөкүмни ялғанға чиқириш вә ағдуруп ташлашқа урунған. Буниңда улар һөкүмәт кадирлири намидин 200 нәччә дөләттә иҗтимаий таратқу һесабатлири ачқан һәмдә аз дегәндиму 38 хил тилда сахта учур тарқитип, дуня миқясидики яшларни уйғур дияридики “бәхтияр һаят” тоғрисида “мәлуматлиқ” қилған. Тәқлидий әқил арқилиқ ясап чиқилған сүрәтләр болса у җайдики кишиләрниң “инақ вә иттипақ” яшаватқанлиқини “намайән” қилған.

Улар йәнә уйғурларниң хитай һөкүмитини “һемайә қилидиғанлиқи” һәққидики бир қатар видйо материяллирини ишләп тарқитиш биләнла қалмаситин, йәнә аз дегәндиму икки милйон хитай пуқрасини һәмдә 20 милйон “вақитлиқ тор ярдәмчилири” ни яллап, хитайдики тор қолланғучиларни һәмдә чәт әлләрдики хитайчә сөзлишидиған җамаәтни “уйғурларниң параван турмуши” һәққидики учурлар билән тәмин әткән. Буниңда хитай мәркизий тәшвиқат бөлүми билән мәркизий тор бошлуқи комитети “қомандан” лиқ ролини ойниған. Хитайниң “чилбөрә дипломатлири” болса ғәрб дунясидики иҗтимаий таратқу супилирида уйғурларниң қирғин қилиниватқанлиқини “қәтий инкар қилиш” һәмдә бу һәқтики тәнқидләргә “кәскин рәддийә бериш” ни баш вәзипиләрниң бири қилған. Техиму қәбиһ болғини, хитай һөкүмити өзлириниң уйғур дияридики зулуми вә қирғинчилиқ қилмишлирини паш қилған тәнқидчиләргә тәһдит селиш, уруқ-туғқанлирини тутқун қилиш қатарлиқ усуллар билән вәһимә салған һәмдә уларниң авазини өчүрүшкә урунған.

Доклатта тәкитлинишичә, хитай һөкүмитиниң бу хил ғайәт зор көләмлик “дунявий җамаәт пикрини контрол қилиш” урунушлири, дунядики һәрқайси ахбарат вастилириниң уйғур дияри һәққидики мустәқил баянлирини қалаймиқанлаштуруш, ялғанға чиқириш вә башқиларниң гуманини қозғаш ролини ойнимақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.