Amérika hökümiti: “Xitay hazir shinjang heqqidiki uchurlarni kontrol qilishqa urunmaqta!”

Muxbirimiz eziz
2022.08.25
Share on WhatsApp
Share on WhatsApp

Amérika tashqiy ishlar ministirliqi 24-awghustta mexsus doklat élan qilip, xitay hökümitining dunya miqyasidiki oxshimighan sorunlarda dawam qiliwatqan Uyghurlar heqqidiki bayanlarni öz paydisigha burashqa urunuwatqanliqini tenqidligen. Doklatta xitay hökümitining bu meqsedke yétish üchün “Chilböre diplomatiyesi”, chet el axbaratliri we ijtima'iy taratqular dégenlerdin paydilan'ghan halda, Uyghur diyari heqqidiki “Ijabiy” uchurlarni tor boshluqigha tökme qilip, jama'et pikrini kontrol qilishqa urunuwatqanliqi tepsiliy sherhiylen'gen.

Doklatta körsitilishiche, xitay hökümiti hemde ular arqa térek boluwatqan shirket we shexsler “Inchikilik bilen layihilen'gen tirishchanliq” arqiliq amérika hökümitining “Uyghurlar irqiy qirghinchiliqqa uchrawatidu” dep élan qilghan hökümni yalghan'gha chiqirish we aghdurup tashlashqa urun'ghan. Buningda ular hökümet kadirliri namidin 200 nechche dölette ijtima'iy taratqu hésabatliri achqan hemde az dégendimu 38 xil tilda saxta uchur tarqitip, dunya miqyasidiki yashlarni Uyghur diyaridiki “Bextiyar hayat” toghrisida “Melumatliq” qilghan. Teqlidiy eqil arqiliq yasap chiqilghan süretler bolsa u jaydiki kishilerning “Inaq we ittipaq” yashawatqanliqini “Namayen” qilghan.

Ular yene Uyghurlarning xitay hökümitini “Hémaye qilidighanliqi” heqqidiki bir qatar widyo matériyallirini ishlep tarqitish bilenla qalmasitin, yene az dégendimu ikki milyon xitay puqrasini hemde 20 milyon “Waqitliq tor yardemchiliri” ni yallap, xitaydiki tor qollan'ghuchilarni hemde chet ellerdiki xitayche sözlishidighan jama'etni “Uyghurlarning parawan turmushi” heqqidiki uchurlar bilen temin etken. Buningda xitay merkiziy teshwiqat bölümi bilen merkiziy tor boshluqi komitéti “Qomandan” liq rolini oynighan. Xitayning “Chilböre diplomatliri” bolsa gherb dunyasidiki ijtima'iy taratqu supilirida Uyghurlarning qirghin qiliniwatqanliqini “Qet'iy inkar qilish” hemde bu heqtiki tenqidlerge “Keskin reddiye bérish” ni bash wezipilerning biri qilghan. Téximu qebih bolghini, xitay hökümiti özlirining Uyghur diyaridiki zulumi we qirghinchiliq qilmishlirini pash qilghan tenqidchilerge tehdit sélish, uruq-tughqanlirini tutqun qilish qatarliq usullar bilen wehime salghan hemde ularning awazini öchürüshke urun'ghan.

Doklatta tekitlinishiche, xitay hökümitining bu xil ghayet zor kölemlik “Dunyawiy jama'et pikrini kontrol qilish” urunushliri, dunyadiki herqaysi axbarat wastilirining Uyghur diyari heqqidiki musteqil bayanlirini qalaymiqanlashturush, yalghan'gha chiqirish we bashqilarning gumanini qozghash rolini oynimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.