Jénnifér brayson: "Amérika néme üchün Uyghurlargha köngül bölüshi kérek?"

Muxbirimiz erkin
2018-09-07
Élxet
Pikir
Share
Print

Amérikiliq tetqiqatchi jénnifér brayson amérikidiki "Waytérspun instituti" ning torida maqale élan qilip, amérikining Uyghurlargha köngül bölüshi kérekliki, uning bu krizisqa sel qarishi insanlarning iztirap chékishini we amérika istratégiyelik menpe'etining ziyan'gha uchrishini keltürüp chiqirishi mumkinlikini bildürdi.

Jénnifér brayson "Amérika néme üchün Uyghurlargha köngül bölüshi kérek" serlewhilik maqaliside, amérikining Uyghur rayonida yüz bériwatqan hazirqi krizisqa diqqet qilishining az dégende ikki sewebi barliqini tekitligen.

Uning ilgiri sürüshiche, buning biri Uyghur rayonida yüz bériwatqan hazirqi krizis bir insanperwerlik tragédiyesi iken. Ikkinchisi, bu krizis amérikining köp xil menpe'etige chétilidiken. U, "Rayonda yüz bériwatqan hadisilerning netijisi amérikining xitay bilen bolghan munasiwitige tesir körsitidighanliqini eskertip, bu yerde bu toqunushning yene yer shari xaraktérlik "Zorawan islami ashqunluq" ni kücheytiwétishi mumkinlikini ilgiri sürgen.

Jénnifér brayson 2004-2006‏-yilliri arisida amérikining gu'antanamodiki tutqunlar lagérida soraqchi bolup ishligen. U maqaliside özining Uyghur mesilisi bilen gu'antanamoda tonushqanliqi, gu'antanamoda "Sherqiy türkistan islam herikiti" namliq bir "Térrorluq teshkilati" ning barliqini shu yerde anglighanliqini bildürüp, bezi Uyghurlar bu térrorluq teshkilatlirigha ariliship qalghan bolsimu, lékin amérika xitayning pütün Uyghurlarni "Térrorchi", dep qarishigha yol qoymasliqi kéreklikini, chünki xitayning buni "Shinjangda rehimsizlerche basturush élip bérishning ruxsiti" dep qaraydighanliqini tekitligen.

Uning ilgiri sürüshiche, amérika Uyghur mesilisining murekkeplikini közde tutup, Uyghurlargha yardem qilish, shundaqla özining menpe'etini qoghdash jehetlerde bezi tedbirlerni élishi kérek iken. U, amérika dölet mejlisining amérika tinchliq institutigha pul ajritip, Uyghurlargha, xususiy weqplerge we bashqa guruppilargha din'gha munasiwetlik toqunushlarni qandaq bir terep qilishni ögitish, tarixchilar özining pikirini otturigha qoyup, jem'iyetke yol körsitishi, ijabiy yol körsiti, amérikiliqlarning ijtima'iy taratqularda bu mesilige pikir qatnashturushi qatarliq tekliplerni bergen.

Toluq bet