Америка дөләт мәҗлисиниң йүздин артуқ әзаси уйғурлар вә тибәтләр мәсилиси бойичә бирләшмә мәктуп елан қилди

Мухбиримиз әзиз
2020-09-11
Елхәт
Пикир
Share
Принт

Америка дөләт мәҗлиси авам палатасиниң әзалиридин әндий левин вә җим мәкговерн башчилиқидики йүздин артуқ дөләт мәҗлиси әзалири бүгүн уйғурлар вә тибәтләр һәққидики бирләшмә мәктупқа имза қойди.

Мәзкур коллектип мәктуп америка һөкүмитиниң чеңду шәһиридики консулханисиниң тақилиш мунасивити билән йезилған болуп, коллектип имза қоюштин кейин америка ташқи ишлар министири майк помпейониң ишханисиға әвәтилди.

Әндий левин әпәндиниң тор бетидин мәлум болушичә, мәзкур бирләшмә мәктупта американиң чеңдудики консулханисиниң тақилиши түпәйлидин тибәт вә уйғур дияридики сиясий вә иҗтимаий вәзийәтни көзитиш механизми еғир бузғунчилиққа учриғанлиқи, буниң билән уйғур дияри вә тибәткә даир учурларни топлаштики әң муһим дипломатик «қәлә» ниң өз функитсийәсини йоқитип қойғанлиқи, буниң билән кишилик һәқлири еғир дәриҗидә дәпсәндичиликкә учраватқан уйғурлар вә тибәтләрниң бундин кейинки әһвалидин хәвәрдар болушниң имкани қалмиғанлиқи алаһидә тәкитләнгән.

Мәктупта уйғур диярида милйонларчә киши лагерларға қамиливатқанда американиң чеңдудики консулханисиниң тақилишиниң уйғур дияридики вәзийәтни көзитишкә сәлбий тәсир көрситидиғанлиқи, шуңа бу мәсилигә һәргизму сәл қарашқа болмайдиғанлиқи тилға елған.

Мәктупта «уйғур кишилик һоқуқ қануни» дики бәлгилимиләр бойичә америка дөләт мәҗлисигә уйғур дияридики кишилик һоқуқ мәсилисигә даир доклатларни тәләп қилиш һоқуқи берилгәнлики, гәрчә уйғур дияриниң вәзийитини көзитиш вәзиписи изчил бейҗиңдики баш әлчиханиниң вәзипә даирисидә болсиму, әмма американиң чеңдудики консулханисиниң тақилип қелиши бу җәһәттики хизмәтләргә сәлбий тәсир көрситиши мумкинлики алаһидә тилға елған. Шуңа улар мушу әһвалларни көздә тутуп: «биз ташқи ишлар министирлиқиниң америка дөләт мәҗлисигә уйғурлар вә тибәтләрниң бундин кейинки кишилик һоқуқ вәзийитини давамлиқ көзитиш һәққидики тәпсилий истратегийәсини тездин йоллишини тәләп қилимиз,» дейилгән.

Мәлум болушичә, бу қетимлиқ мәктупқа брад шерман, кристофер симис, җеннифир векстон, тед йохо қатарлиқ йүз нәччә киши имза қойған болуп, америка ташқи ишлар министирлиқиниң бу җәһәттә бирәр әмәлий қәдәм елишиға түрткә болуш ролини ойнайдикән.

Пикирләр (0)
Share
Толуқ бәт