Amérika dölet mejlisining yüzdin artuq ezasi Uyghurlar we tibetler mesilisi boyiche birleshme mektup élan qildi

Muxbirimiz eziz
2020-09-11
Élxet
Pikir
Share
Print

Amérika dölet mejlisi awam palatasining ezaliridin endiy léwin we jim mekgowérn bashchiliqidiki yüzdin artuq dölet mejlisi ezaliri bügün Uyghurlar we tibetler heqqidiki birleshme mektupqa imza qoydi.

Mezkur kolléktip mektup amérika hökümitining chéngdu shehiridiki konsulxanisining taqilish munasiwiti bilen yézilghan bolup, kolléktip imza qoyushtin kéyin amérika tashqi ishlar ministiri mayk pompéyoning ishxanisigha ewetildi.

Endiy léwin ependining tor bétidin melum bolushiche, mezkur birleshme mektupta amérikaning chéngdudiki konsulxanisining taqilishi tüpeylidin tibet we Uyghur diyaridiki siyasiy we ijtima'iy weziyetni közitish méxanizmi éghir buzghunchiliqqa uchrighanliqi, buning bilen Uyghur diyari we tibetke da'ir uchurlarni toplashtiki eng muhim diplomatik "Qel'e" ning öz funkitsiyesini yoqitip qoyghanliqi, buning bilen kishilik heqliri éghir derijide depsendichilikke uchrawatqan Uyghurlar we tibetlerning bundin kéyinki ehwalidin xewerdar bolushning imkani qalmighanliqi alahide tekitlen'gen.

Mektupta Uyghur diyarida milyonlarche kishi lagérlargha qamiliwatqanda amérikaning chéngdudiki konsulxanisining taqilishining Uyghur diyaridiki weziyetni közitishke selbiy tesir körsitidighanliqi, shunga bu mesilige hergizmu sel qarashqa bolmaydighanliqi tilgha élghan.

Mektupta "Uyghur kishilik hoquq qanuni" diki belgilimiler boyiche amérika dölet mejlisige Uyghur diyaridiki kishilik hoquq mesilisige da'ir doklatlarni telep qilish hoquqi bérilgenliki, gerche Uyghur diyarining weziyitini közitish wezipisi izchil béyjingdiki bash elchixanining wezipe da'iriside bolsimu, emma amérikaning chéngdudiki konsulxanisining taqilip qélishi bu jehettiki xizmetlerge selbiy tesir körsitishi mumkinliki alahide tilgha élghan. Shunga ular mushu ehwallarni közde tutup: "Biz tashqi ishlar ministirliqining amérika dölet mejlisige Uyghurlar we tibetlerning bundin kéyinki kishilik hoquq weziyitini dawamliq közitish heqqidiki tepsiliy istratégiyesini tézdin yollishini telep qilimiz," déyilgen.

Melum bolushiche, bu qétimliq mektupqa brad shérman, kristofér simis, jénnifir wékston, téd yoxo qatarliq yüz nechche kishi imza qoyghan bolup, amérika tashqi ishlar ministirliqining bu jehette birer emeliy qedem élishigha türtke bolush rolini oynaydiken.

Toluq bet