Америка уйғур мәсилисини б д т башлиқлар йиғиниға қандақ елип чиқишни ойлашмақтикән

Мухбиримиз әркин
2019-09-18
Елхәт
Пикир
Share
Принт

Американиң келәр һәптидики б д т башлиқлар йиғинида бир милйон уйғурниң лагерларға қамилиш мәсилисини оттуриға қоюп хитайға қандақ тақабил турушни ойлишиватқанлиқини илгири сүрүлди.

Ройтерс агентлиқиниң 17‏-сентәбир хәвәр қилишичә, америка һөкүмитидики исмини ашкарилашни халимайдиған бир һөкүмәт әмәлдари, ақ сарайниң президент трампниң келәр сәйшәнбә күни б д т омумий йиғинида униң 193 әзасиға нутуқ сөзлигәндә хитайниң уйғурларға тутқан муамилиси вә униң омумий кишилик һоқуқ хатирисини тилға елиш-алмаслиқни ойлишиватқанлиқини билдүргән. Ақ сарайниң бу мәсилидә қандақ хуласигә кәлгәнлики мәлум әмәс. Әгәр президент трамп лагерлар мәсилисини тилға алса, бу уйғур мәсилисиниң б д т омуми йиғинида тунҗи қетим тилға елиниши болуп қалиду.

Ройтерсниң хәвиридә билдүрүлүшичә, ақ сарай йәнә, президент трампниң келәр дүшәнбә күни, йәни б д т омуми йиғинида сөзләштин бир күн бурун б д т да «диний әркинликни қоғдаш йәр шари чақириқи» намлиқ бир йиғинға саһибханилиқ қилиши вә йиғинда президент трампни муавин президент майк пәнсниң сөзгә тәклип қилиши мумкинликини билдүргән. Ақ сарайниң баянатчиси стефани гришам 17‏-сентәбир күни елан қилған баянатида: «президент, хәлқара җәмийәтни инсанларға диний вә етиқади сәвәблик һуҗум қилишниң алдини елиш үчүн конкрет тәдбир елишқа, ибадәтханиларниң муқәддәслики һәм барлиқ диний етиқадларниң җамаәт сорунлирини қоғдашқа чақириду» дегән.

Ройтерсниң хәвиридә қәйт қилинишичә, нөвәттә хитай һөкүмити өзиниң ашкара тәнқидкә учришидин қаттиқ әндишә қиливатқан болуп, у җәнвә вә ню-йорктики йиғинларниң һарписида бейҗиңдики бәзи чәтәллик дипломатлар билән учрашқан. Хәвәрдә йәнә юқири дәриҗилик америка һөкүмәт әмәлдариниң сөзи нәқил кәлтүрүлгән болуп, у ташқи ишлар министири майк помпейо вә муавин президент майк пәнсниң б д т дики йиғилиш арилиқида өткүзүлгән бәзи паалийәтләрдә уйғур мәсилисини тилға елиши мумкинлики, әмма ахирқи қарарниң йәнила «сода мәсилисиниң тәрәққиятиға бағлиқ» икәнликини билдүргән.

Пикирләр (0)
Share
Толуқ бәт