Amérika Uyghur mesilisini b d t bashliqlar yighinigha qandaq élip chiqishni oylashmaqtiken

Muxbirimiz erkin
2019-09-18
Élxet
Pikir
Share
Print

Amérikaning kéler heptidiki b d t bashliqlar yighinida bir milyon Uyghurning lagérlargha qamilish mesilisini otturigha qoyup xitaygha qandaq taqabil turushni oylishiwatqanliqini ilgiri sürüldi.

Roytérs agéntliqining 17‏-séntebir xewer qilishiche, amérika hökümitidiki ismini ashkarilashni xalimaydighan bir hökümet emeldari, aq sarayning prézidént trampning kéler seyshenbe küni b d t omumiy yighinida uning 193 ezasigha nutuq sözligende xitayning Uyghurlargha tutqan mu'amilisi we uning omumiy kishilik hoquq xatirisini tilgha élish-almasliqni oylishiwatqanliqini bildürgen. Aq sarayning bu mesilide qandaq xulasige kelgenliki melum emes. Eger prézidént tramp lagérlar mesilisini tilgha alsa, bu Uyghur mesilisining b d t omumi yighinida tunji qétim tilgha élinishi bolup qalidu.

Roytérsning xewiride bildürülüshiche, aq saray yene, prézidént trampning kéler düshenbe küni, yeni b d t omumi yighinida sözleshtin bir kün burun b d t da "Diniy erkinlikni qoghdash yer shari chaqiriqi" namliq bir yighin'gha sahibxaniliq qilishi we yighinda prézidént trampni mu'awin prézidént mayk pensning sözge teklip qilishi mumkinlikini bildürgen. Aq sarayning bayanatchisi stéfani grisham 17‏-séntebir küni élan qilghan bayanatida: "Prézidént, xelq'ara jem'iyetni insanlargha diniy we étiqadi seweblik hujum qilishning aldini élish üchün konkrét tedbir élishqa, ibadetxanilarning muqeddesliki hem barliq diniy étiqadlarning jama'et sorunlirini qoghdashqa chaqiridu" dégen.

Roytérsning xewiride qeyt qilinishiche, nöwette xitay hökümiti özining ashkara tenqidke uchrishidin qattiq endishe qiliwatqan bolup, u jenwe we nyu-yorktiki yighinlarning harpisida béyjingdiki bezi chet'ellik diplomatlar bilen uchrashqan. Xewerde yene yuqiri derijilik amérika hökümet emeldarining sözi neqil keltürülgen bolup, u tashqi ishlar ministiri mayk pompéyo we mu'awin prézidént mayk pensning b d t diki yighilish ariliqida ötküzülgen bezi pa'aliyetlerde Uyghur mesilisini tilgha élishi mumkinliki, emma axirqi qararning yenila "Soda mesilisining tereqqiyatigha baghliq" ikenlikini bildürgen.

Toluq bet