Юқири дәриҗилик америка дипломати имран ханниң уйғур мәсилисигә көз юмувелишини тәнқид қилди

Мухбиримиз әркин
2019-09-27
Елхәт
Пикир
Share
Принт

Американиң җәнубий асия вә оттура асия ишлириға мәсул мувәққәт ярдәмчи ташқи ишлар министири әлис веллс 26‏-сентәбир пакистан баш министири имран ханниң уйғур мәсилисигә көз юмувалғанлиқини тәнқидләп, униң уйғур мусулманлири билән кәшмир мусулманлириға охшаш муамилә қилиши керәкликини билдүргән.

Имран хан 23‏-сентәбир күни америка ташқи мунасивәтләр кеңишидә нутуқ сөзлигәндә бир мухбирниң уйғурлар һәққидики соалиға җаваб бериштин өзини қачурған. У кәшмир мусулманлириниң һоқуқлириниң дәпсәндә қилиниватқанлиқини тәкитлигән. Әмма хитайни махтап, униң пакистанға ярдәм қиливатқанлиқи, хитай билән һәрқандақ мәсилини йәң ичидә сөзлишидиғанлиқини билдүргән иди.

«Иқтисад вақти гезити» ниң хәвәр қилишичә, әлис веллс пәйшәнбә күни имран ханниң сөзигә инкас қайтуруп, «мән униң хитайниң ғәрбидики әмәлийәттә җаза лагерлириниң шараитида яшаватқан мусулман тутқунларғиму охшаш шәкилдә көңүл бөлүшини көрүшни халаймән,» дегән. Униң илгири сүрүшичә, «мусулманларниң кишилик һоқуқ мәсилисигә кәшмирдин һалқиған һалда техиму кәң даиридә көңүл бөлүнүши керәк» икән. У мухбирға «сиз көргәндәк һөкүмитимиз б д т ниң бу нөвәтлик омуми кеңишидә бу мәсилигә алаһидә иштирак қилип, хитайдики мусулманларниң қорқунчлуқ әһвалини йорутуп беришкә тиришчанлиқ көрсәтти» дегән. 

Уйғур мәсилиси бу һәптә б д т ниң нйо-йорктики баш штабида өткүзүлгән омуми кеңишиниң йиғинлирида муһим мәсилиләрниң биригә айланған. Америка һөкүмити президент трамп, ташқи ишлар министири помпейо вә ярдәмчи ташқи ишлар министириниң саһибханилиқида бир қанчә қетим мәхсус уйғурлар һәққидә йиғинларни өткүзгән. Бу әһвал б д т тарихида тунҗи қетим йүз бәргән иди.

Пикирләр (0)
Share
Толуқ бәт