Amérikining mu'awin prézidénti xudsun institutida Uyghur mesilisini tilgha aldi

Muxbirimiz erkin
2018-10-04
Élxet
Pikir
Share
Print

Amérikining mu'awin prézidénti mayk pens bügün, yeni 4-öktebir küni amérikining eqil ambiri - xudsun institutida nutuq sözlep, Uyghur mesilisini tilgha alghan.

U xitayning diniy erkinlikke buzghunchiliq qiliwatqanliqi heqqide toxtalghanda lagérlar mesilisini tilgha élip, "Kommunistik partiye shinjangda bir milyondek musulman Uyghurni hökümetning lagérlirigha qamap, ulargha qarita ménge yuyush élip barmaqta. Bu lagérlardin qutulup chiqqanlar özlirining bu lagérlarda béyjingning Uyghur medeniyitini yoqitish we musulmanlarning diniy étiqadini meqsetlik yoqitishigha shahit bolghanliqini bildürmekte. Biraq tarixta ispatlan'ghandek öz xelqini basturghan bir dölet shuning bilen boldi qilmaydu. Béyjing özining tesirini dunyagha kéngeytishning koyigha chüshti" dégen.

Mayk pens xudsun institutida sözligen nutqida tramp hökümitining xitay siyasitini omumyüzlük sherhlep, xitayning qilmishlirini qattiq tenqid qilghan shundaqla amérikining xitayning jenubiy déngizdiki tehditige bash egmeydighanliqini bildürgen.

U bir xitay urush paraxotining jenubiy déngizda "Dikator" namliq amérika urush paraxotigha yéqinlashqanliqini tenqidlep, amérikining dawamliq erkin déngiz qatnishi meshghulati élip baridighanliqini tekitligen.

U yene teywen mesilisi heqqidimu toxtilip, xitayning latin amérikisidiki 3 döletni teywen bilen diplomatik munasiwitini üzüshke mejburlighanliqini eyibligen.

Mayk pens yene gerche tramp hökümiti "Bir junggo siyasiti" ni étirap qilsimu, lékin "Teywenning démokratiyeni quchaqlap, pütün xitay xelqige eng toghra yolni körsitip bergen" likini bildürgen. U yene xitayning soda we bixeterlik tedbirlirining amérikigha tehdit séliwatqanliqi, uning bu yil 11‏-aydiki amérika dölet mejlisi saylimigha qol tiqiwatqanliqini tekitlep, "Shübhisizki, xitay amérika démokratiyesige kashila peyda qilmaqta" dégen. Uning ilgiri sürüshiche, xitay özining barliq küchini ishqa sélip, siyasiy, iqtisadiy, herbiy we teshwiqat wasitiliri arqiliq özining amérikidiki tesiri we menpe'etini kéngeytmekte iken.

Toluq bet