Amérika soti shinjangdiki pa'aliyiti seweblik "Qara tizimlik" ke élin'ghan éskuyl toqumichiliq guruhining erzini ret qilghan

Muxbirimiz erkin
2021-10-08
Share

Amérikaning washin'gton rayonluq fédéral soti Uyghur élidiki pa'aliyiti seweblik amérika soda ministirliqining "Qara tizimliki" ge élin'ghan xongkong "Éskuyl toqumichiliq guruhi" ning "Qara tizimlik" tin chiqiriwétish erzini ret qilghan. Melum bolushiche, sotchi régé walton 6-öktebir chiqarghan hökümide ésku'él guruhining bu dawada ‍utalmaydighanliqi, chünki u amérika soda ministirliqining hoquqidin halqip heriket qilghanliqini körsitip bérelmigenlikini éytqan.

Éskuyl guruhi 2020-yili sabiq taramp hökümiti teripidin uning sanjidiki shirkitining Uyghurlarni mejburiy emgekke salghanliqi seweblik amérika soda ministirliqining "Qara tizimliki" ge kirgüzülgen. Éskuyl guruhi buninggha qarshi washin'gton rayonliq fédéral sot mehkimisige erz qilghan.

"Jenubiy xitay etigenlik pochtisi" gézitining xewiride éytilishiche, sotchi régé waltonning qarari éskuylning erzining axirqi xulasisi bolmisimu, biraq bu uning sanjidiki tarmaq shirkitige qattiq zerbe iken. Chünki u bir yildin béri nayké, patagoniye, tomiy hélfigér qatarliq dangliq xelq'ara chöpqetlirini mal bilen teminleshke amalsiz qalghan.

Amérika hökümiti ötken yili éskuylning amérika shirketliri bilen soda qilishini chekligen. Éskuylning sanjidiki zawuti eyni chaghda "Qara tizimlik" ke élin'ghan Uyghur élidiki mejburiy emgekke chétishliq 11 shirketning biri bolghan. Amérika soda ministirliqi shu yili 7-ayda yene 14 shirketni Uyghurlarning kishilik hoquqini depsende qilishta oynighan roli seweblik "Qara tizimlik" ke kirgüzgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet