Рандал ширайвер: «америка мудапиә министирлиқи уйғур мәсилисини хәвпсизлик мәсилиси, дәп қарайду»

Мухбиримиз ирадә
2019-10-18
Елхәт
Пикир
Share
Принт

Америка дөләт мудапиә министирлиқиниң асия-тинч окян ишлириға мәсул ярдәмчи министири рандал шрайвер өзиниң уйғур мәсилисини хәвпсизлик мәсилиси, дәп қарайдиғанлиқини билдүрди.

У, 15-өктәбир күни, америка пайтәхти вашингтондики нопузлуқ тәтқиқат органлиридин «җәймис товн фонди» ниң йиллиқ хитайға мунасивәтлик мудапиә вә хәвпсизлик мәсилилири муһакимә йиғинида сөз қилғанда уйғур елидә йолға қоюлуватқан лагер түзүми һәққидә тохталди. У сөзидә уйғурларниң нөвәттики вәзийитини «хәвпсизлик мәсилиси» дәп қарайдиғанлиқини әскәртип, униң сәвәблирини төвәндикидәк изаһлиди: «алди билән бу хитай компартийәсиниң маһийитини бизгә йорутуп бериду. Йәнә келип, хитай һөкүмити әслидә радикал болмиған бир хәлқниң һәқиқәтән радикаллишишиға йол ечиватиду. Гәрчә 2002-йили биз ‹шәрқий түркистан ислам һәрикити' дәйдиған тәшкилатни радикал тәшкилат, дәп бекиткән болсақму, бүгүнки күндә ундақ бир тәшкилат мәвҗут әмәс. Билгиниңиздәк, қалғини хитай һөкүмитиниң тәшвиқатлири. Хитай һөкүмити шинҗаңда әркинлик тәләп қилған һәрқандақ бир кишини ‹шәрқий түркистан ислам һәрикити' әзаси, дәп қарилайду».

Рандал ширайвел сөзидә, бүгүнки күндә хитай йолға қоюватқан йиғивелиш лагерлириниң террорлуқ вә радикаллиқ хәвпигә җиддий асас яритиватқанлиқини вә буниң торлириниң хитай чегралири сиртиғиму тәсир көрситиши мумкинликини тәкитлиди. 

У америкиниң бу мәсилини «хәвпсизлик мәсилиси» дәп қараштики йәнә бир сәвәб үстидә тохтилип районда йолға қоюлуватқан юқири техникилиқ назарәт вә башқа бесим аппаратлириниң хитай билән идийә ортақлиқиға игә реҗимларға експорт қилиниш имканийитигә игә икәнлики, бир қисим дөләтләргә буниң аллиқачан експорт қилинғанлиқини билдүрди вә «шинҗаңда йүз бериватқанлар кәлгүси бир күнләрдә дуняниң башқа җайлиридиму баш көтүрүп чиқиши мумкин. Бу толиму хәтәрлик ақивәт яритиду» деди. 

У сөзиниң ахирида америка мудапиә министирлиқиниң уйғур елиниң нөвәттики вәзийитидин һәқиқәтән әндишә қиливатқанлиқини тәкитләп «биз бу мәсилини давамлиқ һалда тәкитләп туримиз» деди. 

Рандал шрайвер уйғур елидә йолға қоюлуватқан қайта тәрбийә лагерлирини «йиғивелиш лагерлири» дәп атап, лагерлардики тутқун санини 3 милйон әтрапида дәп көрсәткән тунҗи мудапиә әмәлдари иди.

Пикирләр (0)
Share
Толуқ бәт