Америкадики әң чоң қуяш енергийәси сода тәшкилати америка ширкәтлирини уйғур елидин чекинип чиқишқа чақирған

Мухбиримиз әркин
2020-10-23
Елхәт
Пикир
Share
Принт

Америкадики әң чоң қуяш енергийәси содиси тәшкилати америка карханилирини кишилик һоқуқ дәпсәндичилики түпәйли уйғур елидин чекинип чиқишқа чақирған. Мәлум болушичә, дуня қуяш енергийә тахтиси базириниң 90 мәһсулатини хитай тәминләйдиған болуп, униңға кетидиған кримней қетишмисиниң 65% уйғур елидә чиқидикән. Йеқинда уйғур елидики бир хитай қуяш енергийә тахтиси завутида партлаш йүз берип, дуня қуяш енергийә тахтиси базирида давалғуш пәйда қилған. Бу хәлқара қуяш енергийәси ширкәтлирини җиддиләштүривәткәниди.

Америка «блумберг хәвәрлири» агентлиқиниң билдүрүшичә, америкадики «қуяш енергийә санаити җәмийити» ниң муавин президенти җон смирноф 22-өктәбир баянат елан қилип, «санаәт мәһсулати билән тәминлигучиләрниң кишилик һоқуқ дәпсәндичиликигә иштирак қилишиға йол қоймайдиғанлиқи» ни билдүргән. У «биз кишилик һоқуқ дәпсәндичиликиниң йиргинчлик икәнликигә ениқ чүшәнчидә болушни тәләп қилимиз» дегән. 

Җон смирнофниң баянати «капитал рот» намлиқ базар анализ ширкити қуяш енергийәси санаитиниң «шинҗаң билән болған бағлиниши сәвәблик кашилиға учраш хәвпи артқанлиқи» ни илгири сүрүп арқисидинла елан қилинди. «Блумберг хәвәрлири» ниң тәкитлишичә, җон смирноф, қуяш енергийәси санаити җәмийитиниң қуяш енергийәси тахтилирини шинҗаңда ишләпчиқармаслиқ, ишләпчиқирилса мәҗбурий әмгәктин хали болуш һәққидики бир келишим тәйярлаватқанлиқини билдүргән.

Пикирләр (0)
Share
Толуқ бәт