Кеңәш палата әзаси марк варнер: «уйғурлар үчүн күрәш қилишни һәргиз тохтитип қоймаймиз»

Мухбиримиз әркин
2019-10-30
Елхәт
Пикир
Share
Принт

Америка кеңәш палатаси әзаси марк варнер америкадики бир йәһудийлар тәшкилатиниң дөләт мәҗлисидә өткүзүлгән бир паалийитидә уйғур паалийәтчиләр билән көрүшүп, өзлириниң «уйғурлар үчүн күрәш қилишни һәргиз тохтитип қоймайдиғанлиқи» ни билдүргән.

У бу сөзләрни америкадики «җ кочиси» намлиқ йәһудийлар тәшкилатиниң 28‏-өктәбир башланған дөләт мәҗлисидики һәптилик паалийитигә қатнашқан америка уйғур бирләшмиси идарә һәйитиниң әзалириға ейтқан. Бу, америка уйғур бирләшмиси йеңи идарә һәйәтлириниң бу салаһийәт билән дөләт мәҗлисидики бир паалийәткә қатнишишидур. Бу қетимқи паалийәткә тәшкилат рәиси қуззат алтай, һәйәт әзаси әлфидар илтәбир, интизар қатарлиқлар қатнашқан. Америка уйғур бирләшмисиниң бу һәқтики учурида қәйт қилинишичә, һәйәтләр 4 миң киши қатнашқан бу паалийәткә иштирак қилип, йәһудийлар тәшкилатиниң қандақ паалийәт елип баридиғанлиқиға даир тәҗрибиләргә еришкән.

Һәйәтләр паалийәт җәрянида йәнә америка вирҗиния штатиниң демократик авам палата әзаси җениффер вакистон, делавер штатиниң авам палата әзаси лиса брунт рочестер ханимлар билән көрүшүп, уйғур вәзийитиниң тәрәққиятини тонуштурған, шундақла уйғур кишилик һоқуқ қануниниң авам палатасида қачан авазға қоюлидиғанлиқи қатарлиқ мәсилиләр һәққидә пикир алмаштурған.

Уйғур паалийәтчилири бу көрүшүштә, делавер штатидин кәлгән авам палата әзаси лиса брунт рочестер ханимға «уйғур кишилик һоқуқ қанун лайиһәси» һәққидә мәлумат берип, униң мәзкур қанун лайиһәсини қоллиши вә униңға имза қоюшини тәләп қилған. Лиса брунт рочестер қанун лайиһәсигә имза қойидиғанлиқи һәққидә вәдә бәргән.

Бу паалийәт «уйғур кишилик һоқуқ қанун лайиһәси» 30‏-өктәбир авам палатасиниң ташқи ишлар комитетитида музакиригә қоюлуп, комитетниң бирдәк мақуллиқидин өтүшниң һарписида өткүзүлгәниди.

Пикирләр (0)
Share
Толуқ бәт