Америка дөләт мәҗлиси әзалири “уйғур мәҗбурий әмгикиниң алдини елиш қануни” ни аҗизлаштуруш урунушлириға қарши туридиғанлиқини билдүргән

Мухбиримиз ирадә
2022.11.03
Share on WhatsApp
Share on WhatsApp

Америка дөләт мәҗлисиниң әзаси марко рубийо вә кирис симис бир қисим ширкәтләрниң “уйғур мәҗбурий әмгикиниң алдини елиш қануни” ни аҗизлаштуруш һәрикәтлиригә қәтий қарши туридиғанлиқини билдүргән.

Америка кеңәш палата әзаси марко рубийониң ишханисидин тарқитилған баянаттин қариғанда, америка таможна вә чигра қоғдаш идариси (CBP) ниң америкадики асаслиқ ширкәтләрниң вәкиллиридин тәркиб тапқан таможна тиҗарити мәслиһәтчиләр комитети (COAC) “уйғур мәҗбурий әмгикиниң алдини елиш қануни” ниң йолға қоюлушини аҗизлаштурушни тәләп қилидиған бир тәклип лайиһәсини алға сүрмәктикән.

Буниң билән америка кеңәш палата әзаси Марко рубийо Вә авам палата әзаси кирис симис дәрһал бу мәслиһәтчиләр кеңишигә язма баянат әвәтип, өзлириниң бу тәшәббустин әпсусланғанлиқини вә буниңға қәтий қарши туридиғанлиқини билдүргән.

Баянатта дейилишичә, мәзкур қанунниң иҗра қилиниш әһвалини өзгәртишкә мунасивәтлик һәрқандақ бир лайиһә чоқум дөләт мәҗлисиниң тәстиқидин өтидикән. Шуңа юқиридики дөләт мәҗлис әзалири баянатида бу ноқтини тәкитләп мундақ дегән:

“бәхткә яриша, силәр тәшәббус қиливатқан өзгәртишләрни дөләт мәҗлисиниң тәстиқисиз йолға қойғили болмайду. Әгәр ширкәтләрниң вәкиллири дөләт мәҗлисидә бундақ бир өзгириш үчүн дөләт мәҗлисидә лобийчилиқ қилидиған болса, биз уларға күчлүк йосунда қарши туримиз. Силәрниң хитай компартийәси билән мунасивәтлик һәрқандақ бир ширкәтниң ирқий қирғинчилиқтин пайда алмаслиқиға вә америкалиқ истемалчиларниң мәҗбурий әмгәк билән ясалған таварларни сетивалмаслиқиға капаләтлик қилишиңларни сораймиз.”

“уйғур мәҗбурий әмгикиниң алдини елиш қануни” америка дөләт мәҗлисидики һәр икки партийәдин болған әзаларниң зор қоллиши билән мақуллинип, 2021-йили 12-айда президент байдинниң имзаси билән рәсмий қанунға айланған иди. Америка таможна вә чегра қоғдаш идариси 2022-йили 6-айдин башлап, мәзкур қанунни иҗра қилишни башлиған. Нәтиҗидә уйғур елида ишләпчиқирилған һәр қандақ мәһсулатниң америкаға кириши чәкләнгәндин сирт, хитай өлкилиридики уйғур мәҗбурий әмгикигә четишлиқ ширкәтләрниң мәһсулатлириму тосуп қелинған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.